謝安琪怨老公亂砌 碌地周身傷
歌手謝安琪（Kay）前晚現身灣仔會展出席音樂會，跟從台灣遠道而來的楊宗緯同台演出。兩人更合唱王菲的《因為愛情》。Kay自言該曲是其至愛：「好開心可以同宗緯合作，呢首歌我連張繼聰都唔會同佢唱。」Kay又透露老公張繼聰有到場支持，不過就笑指這是對方贖罪之舉：「前兩日夜晚同佢做運動。佢跑步，我就踩架佢砌嘅板車，點知踩踩吓架車斷開咗。我好似拍戲咁碌落地，連大髀都擦損晒。」
鑊鑊多手尾
她憶述當時只懂放聲大笑：「我笑到起唔到身，佢好內疚咁衝埋嚟話：『係我害死咗你！』佢之前話架車好穩陣，地震都唔爛，所以第時佢話好穩陣嘅嘢，我唔會再信。」接着又爆老公：「佢都擅長整呢啲嘢，試過自己砌個櫃，結果砌完後地板花晒。」
逃亡夠情趣
而張繼聰昨日在電視城為《超級巨聲4》錄影，對於老婆稱以後不准他砌車，他就表示會克服陰影：「但佢就冇講到故事後半段，炒車個位係離我哋屋企最遠個位，之後就抬住架板車同佢跑番去屋企，都幾浪漫。喺條冇人嘅街度，有少少似（美劇）《The Walking Dead》咁，隨時有喪屍。」
雖然事後他覺得甚有情趣，同時坦言仍有餘悸：「睇住佢爭啲碌入貨車底，我以為自己小心啲就得。」更反指老婆比自己有天分，因為別人上網買衫，她就上網買電鑽，仲同屋企工人姐姐齊齊研究。
文：音樂組