藍男2.14成婚 米奇見證

王祖藍前晚在無綫台慶上向李亞男求婚獲答應,感動全城,收到巨鑽的亞男更說開心到瞓唔着。雖然祖藍宣稱未諗掂擺酒安排,但據本報可靠消息,祖藍將在迪士尼樂園筵開百席,在米奇老鼠見證下迎娶亞男,他更選定明年2月14日情人節為大喜之日,實行浪漫滿瀉,冧到你爆!

王祖藍與李亞男拍拖五年,前晚無綫台慶祖藍作出「世紀求婚」獲答應,但祖藍拒透露婚禮安排,但據知他決定明年情人節,在迪士尼樂園筵開百席婚宴。祖藍和亞男一向喜歡迪士尼人物,去年祖藍生日、今年情人節燭光晚餐,就連祖藍有份策劃的劇集《老表,你好hea!》的部分拍攝工作,都在迪士尼進行。

送匙扣都應承

在台慶慶功宴後已到內地工作的祖藍昨接受電話訪問時,被問是否出年情人節在迪士尼搞婚宴,他說:「過幾日有公布,其實我好唔捨得求婚夜就咁完結。(亞男話求婚戒指有三卡?)總之遠超傳媒估計,心意為重!」

亞男昨戴閃爆婚戒返電視城開工,她說:「開心到瞓唔着,好似發緊夢,瞓都想戴住戒指,隻戒指三卡以上,但即使祖藍攞個鎖匙扣嚟,我都應承。唔捨得佢咁快又返工,想佢留低慶祝,但我25號生日,佢會返嚟陪我慶祝。(習慣被叫王太?)接受,但未係住。(想直播婚禮?)唔使,尋晚(前晚)已經史無前例,(嗰刻趕住戴求婚戒?)當時諗唔到嘢,只覺手上嗰隻唔需要,有隻我想要嘅等緊我。」

一對準新人前晚台慶後應傳媒要求,兩度咀嘴又合巹交杯,亞男表示:「事前唔知(求婚),喺耳機聽到工作人員話有事,我驚個魔術出意外。」問祖藍會否覺得有騎劫台慶之嫌?他說:「借嚟使吓啦!(畀無綫直播結婚?)未諗。(亞男有孕?)你即係話佢肥咗?」

志偉幕後軍師

而曾志偉原是求婚計劃的幕後軍師,他說:「祖藍決定娶亞男,諗緊點宣布,我話不如大件事啲,就台慶啦,度咗個通宵,好似娶新抱。(騎劫台慶﹖)有話題性就最好,汪明荃、鄭裕玲同我都喊,水淹一廠。(想佢哋早生貴子?)好難講,兩個都咁純,可能唔識洞房!」志偉昨到東莞出席高球活動,否認兒子曾國祥明年結婚。

文:影視組