周家蔚報喜再佗慈姑椗
藝人周家蔚9月時被本報踢爆成功再為洪家添丁，不過礙於習俗，家蔚始終保持低調未有向外「報喜」。昨日腹大便便的她足踏六吋高跟鞋出席活動，並正式公布喜訊，透露將為老公洪天明再添男丁！
家蔚在活動上宣布已懷孕四個月，並透過產檢得悉腹中塊肉是男丁。她既然佗B還「犯險」以高跟鞋示人？家蔚自爆已獲老公天明的批准：「慣咗着咁高，老公仲幫我揀鞋嘅顏色。（辛苦？）反而係成日嘔同皮膚敏感令我好辛苦。我上次佗仔肥咗六十磅，今次目標係肥三十磅，戒晒甜嘢！」她更爆料指老公與老爺洪金寶得知喜訊時又驚又喜：「老公同老爺都好開心。（老爺想抱孫女？）佢應該好想要。（老公有咩獎勵？）唔需要，我最想佢多啲時間留港。如果佢之後要長期留喺內地，我想帶埋囝囝去陪佢。」
將兒子扮女仔
談到日前家蔚將囝囝洪大仁（TJ）打扮成女仔，並將照片放上微博，問她是否恨生B女？家蔚坦言：「所有先兆都係B女，我同老公好心急，緊張到改晒女仔名，仲叫TJ嗌妹妹。我太鍾意女，不過我都開心，好似陳茵媺同陳倩揚會分享有兩個仔嘅好處。（再追B女？）要睇吓生兩個應唔應付到，今次生完要等多年幾先。」並預告誕下第二胎後將專心湊仔。
文：影視組