甄澤權穿越時空 投保千萬
甄澤權將在11月30日假九展Star Hall舉行「甄澤權世界魔術巡迴之旅－－香港站」，昨日他到電台報喜，稱門票賣出九成，暫不考慮加場，但會計劃舉行Part 2。他表示今次是首度在香港舉行大型表演，屆時將會在100分鐘內獻出不同的魔術。講到最矚目的環節，就是Louis將化身「Magic版多啦A夢」，帶觀眾坐上時光機：「最犀利一個魔術係坐時光機，穿梭時空，呢個表演係從未做過。」
至於嘉賓方面，他請來徒弟陳嘉寶（Anjaylia）獻技，有望睇到兩師徒合作：「Anjay跟我學魔術，但依家諗緊佢單獨表演定一齊做，另外仲會有一位神秘嘉賓，好多人都好期待我哋合作。」
擔心唱歌趕客
難得今次是處男大型騷，Louis希望在台上一圓歌星夢，開金口唱歌：「我有個小小心願，就係喺台上唱歌，但係畀人反對，驚觀眾一聽到就會走晒。」他又透露現正積極操弗，因魔術師需要足夠體能，在舞台上跑來跑去。據知，Louis屆時將會有不少高難度演出，高空、玩火樣樣出齊，早前他在練習時不慎扭傷，有見及此，主辦商方面為他買重保險，將保額加大至一千萬。
文：音樂組