Leslie爆料 數臭黃家強
歌手黃家強早前在微博發毒誓大爆Beyond「拆夥真相」，跟家強積怨十多年的前Beyond經理人陳健添（Leslie）亦加入「戰陣」，本報收到Leslie「萬言書」逐點反駁家強的指摘，但家強一於懶理是非，帶同長子黃慶陽北上巡唱，搵錢至上。
家強和Leslie的恩怨長達十多年，早前因家強在微博發「死全家」毒誓，狂數昔日隊友黃貫中（Paul）八宗罪，大爆當年Beyond拆夥因Paul嫌棄葉世榮賺錢能力有限，此文觸發神隱於澳洲多年的Leslie不滿，撰「萬言書」及多份文件反駁家強並澄清指控，Leslie在電話中說：「我花咗個幾星期重新整理呢批文件，係想公開『最真嘅真相』，誰是誰非由大家去思考。」
「出賣Beyond」
家強曾指摘Leslie令Beyond簽下「五十年不平等合約」，Leslie認為是斷章取義，蒙騙不懂版權法的大眾：「這個所謂的不平等合約，只是當年黃家強續約香港滾石，合作炮製宣傳第一張唱片，找個爆炸性罪名強加於我身上的活劇。」對於家強鬧Leslie為賺錢推出粗糙、沒修飾的Beyond demo，Leslie說：「2008年家強出版《弦續－別了家駒十五載》，內裏收輯了五首家駒原裝demo，論音質，Kinn's（Leslie公司）出版的和家強相差無幾，如他所言，同樣都是粗糙及沒修飾，家強亦係佢自己口中嘅『出賣Beyond』！」
「王上」大晒
Leslie又反駁家強所指「Paul說不想再養葉世榮」的說法：「Beyond的收入絕對由三子平分，何來誰養誰、或者養不起誰的說法？」又指三子一直傳不和，會否因Paul一句說話而拆夥？Leslie更爆出秘聞：「聽說『某人』被稱為『王上』，巡唱要分班機前往，更聽說1999年錄Beyond最後一張大碟時，葉世榮望可多唱兩首歌，以便日後發展，卻有人說：『唱咩呀！唱、唱卡拉OK呀？一人一首呀？』」
然而，家強似乎未受停不了的是非影響，先後到重慶、廣州巡唱，更請長子黃慶陽在廣州上台演出，令氣氛更熾熱，有網友留言大讚家強型爆！記者聯絡家強追問對Leslie的「萬言書」回應，惟截稿前仍未有回覆。
文：音樂組