陳敏之做曲奇王后 BB要讓路
「索腿天后」陳敏之新婚後榮升老闆娘，位於天后的曲奇餅店昨日開幕，獲多位圈中好友撐場，包括前無綫高層陳志雲、伍詠薇（伍姑娘）、郭晉安夫婦及林子善等，傳再懷孕的周家蔚穿平底鞋到場，敏之及伍姑娘更High爆咀嘴！現場有逾半百途人圍觀逼爆，擔任司儀的森美亦被逼到街坊堆中，認真搞笑！
老公幕後軍師
敏之透露與幾位股東合資七位數，由試味到開舖籌備近一年，老公做「幕後軍師」給意見，她說：「因為我鍾意食曲奇餅，想發放正能量畀全世界，我哋個名『BLESSCUIT』有祝福意思，買餅會送祝福卡，希望收到餅嘅朋友會感受到我哋嘅愛。（唔使搞真BB？）冇時間！我第一次做老闆娘，想集中喺呢度，老公冇埋怨，佢都好鍾意呢款曲奇。」她又計劃明年初在九龍區開分店，野心甚大：「希望將來成為香港手信！（撼曾志偉代言嘅餅家？）唔係，志偉哥地位冇人能撼到，我想代表曲奇界做『曲奇王后』！」
伍姑娘兜生意
以廚師造型到場的陳志雲送上「B」字曲奇，祝福敏之做Boss（老闆）之餘亦盡快生B！他又大讚敏之的「鎮店之寶」黑松露曲奇，笑言會狂掃一千盒！同場的伍姑娘笑說：「我買994盒，4係lucky number。（有興趣入股？）好似好多股東喎，佢做食嘅，我做美容嘅，希望大家都好，食肥咗就嚟搵我！」
文：影視組