傅明憲：咬過人嘅狗好難教
葉璇愛犬噬咬內地女演員李依曉，發生此一「意外」令圈中不少愛狗之士震驚不已。傅明憲不知當時發生甚麼事導致狗隻失控，但咬到要縫廿幾針都好嚴重，她說：「唔一定大狗先會咬人，有時細狗都會咬人，最重要係睇天生同後天點教，所以大狗出街最好戴口罩，同有專人拖住，如果雄性嘅最好幫佢哋絕育，減少佢哋雄性賀爾蒙，咁會溫和啲，另外主人同狗狗可以一齊上堂，訓練佢哋馴服啲，不過開口咬過人嘅狗已好難教。」
英皇藝人衛詩雅則說：「帶大狗出街，尤其去陌生同多人嘅地方，一定要拖繩同用口罩。雖然寵物狗主動襲擊人嘅機會比較低，但每隻狗嘅性格唔一樣，係人見到咁大隻狗都驚，做多一步會好啲。」
「狗癡」方中信與莫可欣夫婦聞得消息後不禁謂：「我哋對事唔對人。其實狗主應該最清楚自己隻狗嘅性格同脾氣，如果係咁就唔應該帶佢去太多人嘅地方。若果有驚狗嘅小朋友要嚟我屋企，我哋會將啲狗暫時鎖上天台度囉。」
家有古代牧羊的陶大宇喜歡養大狗，他說：「首選溫馴品種會好啲，如果養品種惡少少嘅，帶返屋企前可以搵專業人士訓練吓先，狗狗出街記得要戴口罩。」
歌手吳若希的唐狗愛犬身形龐大，她說：「大部分狗都是本性善良，唔會亂傷人，我唔會帶狗去開工，佢可能怕陌生人，會有異常反應，真係有需要會小心睇住佢，幫佢戴口罩。」