無綫花旦鍾嘉欣與伍允龍大玩地下情七年，前晚終高調現身撐「男友」擔正的電影首映禮，又「世紀同台」大方合照！雖然兩人仍口硬未有承認戀人關係，但在台上不時甜笑互望「蜜蜜斟」，又揚言不排除情侶檔拍殭屍片。

鍾嘉欣秘戀伍允龍多年，一直被指不肯公開承認拍拖，直至月前《好報》直擊二人親密拍拖斷正，有圖有真相！終於促使嘉欣BB確定男友身份，趁阿龍擔正做男主角，前晚以女主人姿勢現身活動，送上自己這份厚禮予以打氣。

前晚阿龍、監製王晶、關楚耀、陳靜師妹羅子喬（Bella）和「晶女郎」胡然等出席《天師鬥殭屍》首映禮，另一男主角鄭中基因病缺席，反而谷胸捧場的莊思敏及唐紫睿更為性感！期間嘉欣BB突然殺到，猶如女主人般搶盡鏡頭，兩口子還應邀大方合照，殭屍也識做彈開，在場數十傳媒頓時起哄，兩人表現不算尷尬，卻不避忌互望「蜜」斟。當晶哥送上一道「哪叱動作必殺符」給阿龍時，大會司儀笑說：「鎮住鍾嘉欣嘅符？」晶哥即將他們的緋聞擺上台，打趣道：「鍾嘉欣梗係必殺啦！」令在旁的阿龍尷尬傻笑。

嘉欣BB直認是阿龍請她到場，今次亦是六年來首次睇首映，認真畀面「男友」，她說：「阿龍請我嚟嘅，啱啱拍完劇多咗時間，呢行好靠關係，不嬲都係你撐我我撐你。（同台合照尷尬？）冇冇冇！（感情浮面？）唔關事，只係好簡單今日得閒，有朋友請我睇戲咪嚟囉。（今日公開戀情？）睇戲啫！有另一個朋友一齊嚟睇，香港好耐冇拍殭屍片，以前細個睇好多，好好睇。」笑問兩人會否一齊坐？驚的話挨落阿龍度？嘉欣BB說：「我驚起上嚟會瞇埋眼、縮埋一舊。（縮落佢度？）唔會，一陣應該同女性朋友坐。」又說想扮演西式吸血殭屍，不排斥與阿龍合作，一切睇緣分：「想唔代表會有，不嬲拍戲睇時機。」若然有人搵先要經公司、角色適合及有挑戰都會考慮，但未有人找她。

擔任動作指導的阿龍首次與偶像元彪合作，夢想成真有點緊張：「以前佢有介紹我拍戲，同佢合作有壓力，但我知佢做到嘅，佢係好好打嘅演員。（今次有搞笑戲？）冇難度，我平時都好搞笑！」

文：影視組