蕊蕊騰雞魔爪傷隊友
蕊蕊領軍的女子組合HunterZ昨日在北角東碼頭試玩鬼船，眾人百無禁忌爬入棺材又影「車頭相」，蕊蕊更刮到隊友陶枳樽見紅！同場的o靚模Naomi也嚇到喪扯「綠魔」Karl（許嘉浩）；洪杰與緋聞女友朱紫嬈亦翹實入鬼船。
女子組合HunterZ、歌手洪杰與緋聞女友朱紫嬈（Khloe）、「綠魔」Karl（許嘉浩）、o靚模Naomi（馮鎵瀠）、姚洛銘（Jason）及迪子等昨日獲邀到北角東碼頭，試玩以700萬打造的港式鬼船「鬼哭神號」，眾人在碼頭和船上跟萬聖節裝飾、鬼怪合照。出名細膽的蕊蕊甫上鬼船，已啟動「保護程式」匿在成員堆中，帶頭行的何麗娟（Kelly）和鄧詠雪（Suetzi）表現興奮，相反被彈出的鬼嚇到喪嗌的蕊蕊，更使出「魔爪」刮到陶枳樽（Crz）雙手通紅，非常誇張。
之後，四女又百無禁忌爬入棺材影相，Crz笑稱一啲都唔驚：「呢個係道具，加上我哋又唔係瞓，『升官發財』呀！」她們更於靈堂逼埋合影「車頭相」，認真大吉利是！經常自己嚇自己的蕊蕊，直言平日沖涼也會驚，會否搵男友金剛做保鏢陪玩鬼船？她笑道：「佢話無聊、唔驚喎，所以唔會陪我玩，我懷疑可能係佢驚。」
洪杰英勇護花
百厭的Karl和Jason則拖實Naomi入鬼船，兩子沿路不停主動撩鬼玩，可憐的Naomi被撒溪錢的「鬼婆」嚇到花容失色。至於「情侶檔」現身的洪杰和Khloe孖住玩，Khloe被嚇得翹實「男友」逃走，Man爆洪杰則淡定地保護對方。
文：影視組