Fiona冰山美人手臂遭殃

歌手薛凱琪(Fiona)懷念當年演「學警」的短髮look,新專輯再次施髮術,難得老闆黃柏高(Paco)也玩埋一份,Fiona為騷性感,手臂遭「假冰」搞到出水泡,我見猶憐。

Fiona早前忙完紅館兩場演唱會,近日專心為新專輯宣傳,之前Fiona拍攝新碟封套,為造型構思不少時間,最終Fiona想到9年前拍劇集《學警雄心》時,剪了一頭短髮,當時外間回響很大,經多年後仍然有人提起,故她靈機一觸,決定在新碟造型重溫短髮的型格味道。Fiona謂:「做歌手應該形象百變啲,一直都係長頭髮其實都會悶,所以拍唱片封套或者MV嘅時候,就可以嘗試唔同嘅嘢。」

Paco探班玩一餐

拍攝當日,髮型師準備了多個藍色假髮,古靈精怪的Fiona見老闆Paco專程探班,便提議跟Paco一起戴假髮合照,向來玩得的Paco當然奉陪,齊齊「變髮」令工作人員笑聲四起。

換上短髮的Fiona穿上綠色毛毛衫大騷香肩美腿,站在一座重金特製的「冰山」後拍照,透現若隱若現的誘惑。不過,由於「冰山」以化學物料製成,Fiona拍攝時長時間以手臂觸碰,初時不以為意,但完成拍攝去慶功時,Fiona才發現手臂已長滿水泡,又紅又癢,Fiona笑言:「真係痕到想斬斷雙手!」最終她要回家敷「真冰」及塗藥膏才告好轉。

文:音樂組