薛家燕扮16擒蕭正楠
薛家燕昨日以白衣飄逸女鬼look，宣布將繼王祖賢及劉亦菲後，演出艷鬼聶小倩一角，化身心境16歲的少女與蕭正楠所演的寧采臣上演「人鬼情未了」，家燕姐笑言無懼正楠女友黃翠如呷醋。
薛家燕、蕭正楠（Edwin）、湯盈盈等昨日現身無綫賀歲劇《倩女失魂》開鏡拜神，家燕姐更為大家帶來驚喜，宣布將演出聶小倩一角，她說：「起初接到要演《倩女》，我仲諗演邊個嘅阿媽呢？點知係我做小倩喎，故事講我死時16歲，結果我一直以為自己仲係16歲，喺蕭正楠演嘅寧采臣面前成個少女咁。我覺得好啱我做，因為我心態都係少女。」
家燕姐更即場與Edwin扮咀嘴，她聞得Edwin想與她演感情戲，即笑言：「我見到蕭正楠都想咀佢呀！可能我哋會有緋聞添，因為我鍾意後生仔。（唔怕黃翠如呷醋？）我都想認識翠如，但如果我可以吸引到年輕後生仔，或者佢都應該跟我學吓嘢啦！（你咁講點同男友交代？）咪等佢畀啲心機囉，有啲危機感。（你想男友玩激情？）唔係激情，係甜蜜！」
湯盈盈開工掛住女
Edwin恨與家燕姐演感情戲，他說：「劇中我同吳若希至係一對。（有親熱戲？）劇本未出唔知道，但古裝都好難好親熱，或者木桶沖涼，但我想同家燕姐演囉！（怕同吳若希親熱，要同翠如備案？）唔使，做嘢啫，大家明白。佢呢輪開緊綜藝節目《我係小廚神》，我拍完呢個劇，再接另一套。（女友冇劇開？）未輪到合適劇種啫！」
湯盈盈演女版燕赤霞，她說：「愈近開劇愈唔捨得個女，（叫錢嘉樂幫手湊？）佢都就嚟開戲，我已經幫個女報多一日playgroup，好在爹哋、媽咪返咗嚟香港，可以幫手湊，依家至發現媽咪咁好。」
文：影視組