Mia浸奶美白打出生天
皮膚白滑的陳靜儀（Mia）原來最愛出海玩水，更醒出私人貼士教愛美的女士們如何狂曬仍能保持「白雪雪」，除了勤做防曬外，最好是浸埋牛奶浴！而經常北上工作的她又自爆想磨練演技，無論打女、奸角抑或醜女，她都願意一試！
「模媽」陳靜儀（Mia）外表斯文柔弱，原來內裏狂野，最愛玩水上活動！除了趁夏日炎炎與家人帶囝囝囡囡到沙灘玩沙外，閒時心血來潮就會出海同陽光玩遊戲，更練得一身好技術：「同仔女會帶埋狗去沙灘玩，不過出海私隱度比較高，我又鍾意玩wakeboard同水上電單車，技術都OK。」身為美容達人的Mia同時溫馨提示女士要做足防曬及美白工夫：「要成日搽防曬，仲要揀4、5點冇咁曬先去玩水。曬後要做身體磨砂再敷mask，最好去浸個牛奶浴！」
隨時閃婚
近來Mia專注北上搵人仔，又拍微電影又到夜場打碟，更積極學戲增進演技兼練好「煲冬瓜」，誓要做個好戲之人，搣甩性感形象開拓新戲路：「其實我好想做打女、奸角同醜女，或者做類似吳君如嗰類嘅搞笑角色。」從小就「電視撈飯」的Mia更希望拍電視劇：「細細個睇電視大，會幻想自己拍劇，如果拍到劇，媽咪喺電視入面見到我都會幾開心。」
雖然Mia出外工作令親子時間減少，但她坦言聚少離多very good：「最長一星期都可以返香港一次，一返嚟就好黐我，反而以前日日有得見就各有各玩唔理我。」Mia更自爆緣分天注定，可能隨時閃婚：「依家感情生活一片空白，有好多嘢諗，例如小朋友。不過遇到啱嘅人，就唔排除會隨時閃婚。」
Profile
姓名：陳靜儀（Mia）
年齡︰25歲
身高：1米65
三圍︰32C、23、33.5