蔡加讚剪臍帶 震撼落淚

「玩具大王」蔡志明孻仔蔡加讚,與甄子丹姨仔汪圓圓前日誕下愛情結晶品後,昨日首度接受傳媒訪問,作為新任爸爸的他難掩興奮之情,除親自入產房為愛女剪臍帶外,亦透露刻意安排圓圓在中秋前夕剖腹分娩,希望趁假期方便照顧妻女。

蔡加讚與甄子丹姨仔汪圓圓結婚未夠一年,即榮升父母,於上周六(六日)早上在仁安醫院剖腹分娩,誕下約7.5磅女嬰,是蔡家首個金叵羅內孫,蔡、汪兩家各成員也紛紛趕到探望。由於圓圓需要休養及安排產後事情,故這對新任父母一直未有公開現身。

昨日早上約10時,與妹妹感情深厚的汪詩詩率先到達醫院,不發一言便匆匆步入乘升降機,似乎不願搶風頭。於早上11時許,新任爸爸的加讚在公關的安排下接受傳媒訪問,雖然他一臉倦容,仍難掩興奮心情,他表示:「前幾晚陪圓圓入嚟,昨日一早開刀,有入產房同剪臍帶。(擇日?)冇習俗,但幾好日子,一早定咗日子係昨日,因為星期二係中秋節假期,方便我照顧圓圓,屋企人同朋友嚟探佢。」

為女着想哺母乳

加讚形容女兒出世的一刻,感到非常震撼及感動,與圓圓在產房中相擁而哭。問到女兒的長相?他表示:「頭髮多、身形偏高同眼大大,仲有嘴仔好得意,日日個樣唔都同,屋企人講法都唔同,自己覺得似媽咪,好靚女。(改名未?)仲諗緊,因為會影響佢一生,最緊要好聽,都會畀屋企人、婆婆同長輩過目。(生多個?)再諗,咁長遠,大家仲年輕。(中秋前出院?)未咁快,要等醫生決定。」為女兒的健康着想,圓圓現正考慮餵哺母乳,自己亦正在學習換尿布。

愛心補湯給新抱

其後,同日下午,蔡加讚母親蔡李惠莉亦有現身醫院,逗留一個多小時多才離開,榮升嫲嫲的她,指今個中秋節特別高興,步上座駕前更透露孫女的新狀況:「今日BB幾好,收咗水,個樣唔同咗,都係咁靚。(送大禮畀BB?)留畀爺爺諗。(湊B心得?)加讚都抱得好好,慢慢嚟。」又透露燉了愛心補湯給汪圓圓,她表示:「都係啲清湯,因為佢未食得嘢住。」而圓圓表妹湛琪清亦前來探望,但未有停下受訪。

文:名人組