陳凱琳認真出擊：fighting!

現年23歲的陳凱琳，樣貌十足混血兒，鼻高眼大，五官輪廓分明，但其實她是百分百中國人。她處事認真，給人過分成熟老練的感覺，她自言已學識不再關注別人看法，因愈是關注，愈顯得自己介意，她說：「講我屋企、父母，講我血統，以前我會好唔開心，因為扭曲咗。又好似話我似印度人，我其實好開心，因印度女仔好多好靚女，但講到好似批評緊印度人，呢樣我就最唔鍾意！我覺得每個人都應該尊重其他國家種族嘅人。」她續說：「由我第一日入行就唔會玩，人哋話我選美好認真，因我唔係嚟玩，唔想嘥人時間，認真係好開心嘅事，將來先唔會有遺憾。」

龍鳳胎心靈感應

現正在拍攝新劇，每晚凌晨三點才收工的她，坦言在香港工作，每個人也有壓力，互相鼓勵非常重要。一句「fighting！」配合扭起手瓜向下的肢體動作，雖帶點傻氣，卻是她為自己打氣最奏效的方法，自覺不是單打獨鬥。而她亦開始為龍鳳胎胞弟打氣：「今年細佬喺加拿大畢業，開始搵出路，依家做緊保險，都有興趣做銀行。佢唔喺香港大，返嚟發展可能會覺得孤獨陌生，但我會鼓勵佢，若將來真係唔適應，都可以返加拿大。不過，自己梗係想見佢多啲。」兩姊弟感情要好，未知龍鳳胎是否都能心靈感應？她笑言每次與細佬傾心事，都會知對方答案，但還是很想聽，因可從中聽聽男性想法。

唔愛出街的陳凱琳偏愛有上進心的男士。	陳凱琳憑靚樣跳入娛樂圈，被譽為近十年最索港姐冠軍。	放大圖片

深閨宅女百厭時

她又透露特別喜歡有上進心，及會為女友而努力的男士：「如果佢會煮飯，會寫歌就更加好。」不過深閨的她，自言做其男友是一件苦差，她說：「我好悶o架，有輕微『宅』，但應該唔算真係宅女。我平日唔鍾意出街，最鍾意落雨天、行雷閃電，咁就有藉口畀我推朋友約會。第時男仔同我拍拖都幾慘，出街食飯多人又要搵位，我寧願留喺屋企煮飯食算，哈哈哈。連爹哋媽咪都多朋友過我，夜晚11點媽咪未返屋企，我就會打電話叫佢快啲返。但我都做過好多好曳嘅嘢，讀中學時，試過約埋個男仔朋友，趁隔籬屋唔喺香港，偷偷地爬入去，去人哋個泳池游水，我仲有好多百厭嘢，不過都係講啫，有計劃，但無實行。」

小時候的凱琳曾立志為節目做主持。

陳凱琳坦言受母親潛移默化影響，愛簡約首飾。

圓兒時夢做主持

陳凱琳小時候寫我的志願，並非做港姐。曾在溫哥華做過時裝售貨員、超市理貨員和侍應等多份兼職的她，原來自小立志成為幼稚園教師和做節目主持。而正正第一份工作就是無綫藝員，曾主持過節目，可謂實現了理想。近日她拍攝入行後，第二齣劇集《四個女仔三個bar》，愈發覺自己對演戲甚感興趣。

簡約首飾意義濃

陳凱琳平日愛戴首飾，款式方面受父母潛移默化影響，以簡約為主：「因為父母買開呢類款式的首飾畀我。受佢哋影響，慢慢都鍾意啲簡單嘅設計。」她表示父母曾在她畢業時，送她一條頸鏈，至今珍而重之，她說：「頸鏈上有三個圈，兩個用銅製，一個銀製，代表父母和我。畢業後我返香港選美，父母都陪我返嚟支持我，大家就好似三位一體。」

文：Tracy Leung

攝：吳文聰

化妝：Roxend Nguyen

髮型：Patrick So

首飾：Swarovski

場地：Beef & Liberty