陳百祥珊瑚婚 情歌冧秀姑
藝人陳百祥（叻哥）與黃杏秀前晚現身於長沙灣某火鍋店，與七十位朋友齊齊慶祝二人的結婚35周年「珊瑚婚」紀念，工作人員捧出燒乳豬時，叻哥攬實太太唱歌示愛，又大讚太太：「佢唔係人，係天仙下凡！」
陳百祥與黃杏秀前晚慶祝結婚35周年「珊瑚婚」紀念，到賀好友包括莎莎國際主席郭少明及老婆羅桂珍、前無綫高層梁家樹、導演王晶、藝人羅家英及羅鈞滿等。郭先生為晚宴準備了大量紅酒、白酒之餘，更贈送兩人一支「超巨型紅酒」，容量相當24支750ml紅酒。飯局至晚上九時左右，工作人員捧出燒乳豬為二人慶祝，叻哥即攬實秀姑唱中、英情歌，又以《小風波》向太太示愛，面貼面冧爆秀姑。叻哥又向太太發表愛的宣言：「我一生人嘅幸福，竟然係一個咁嘅女人嫁畀我，佢唔係人，佢係天仙下凡。」
不喜歡二人世界
叻哥笑謂今次只是純粹找藉口約老友食飯，被問到為何不大事慶祝？他笑道：「點解要大搞？搞我都幾慘，我唯一一生係錯呢樣，如果唔係幾多女人鍾意呀，我咩條件都咁好。（太太埋怨每年都一班人慶祝？）唔係喎，佢搞o架喎，佢最鍾意朋友，永遠唔鍾意二人世界，呢個係我哋共通點。」至於有沒有準備禮物？叻哥說：「冇，唔使送，佢乜都擸晒，我幫佢打工。」談到相處之道，叻哥就謂最重要是開心，二人未有小孩沒有壓力，朋友夠多就自然健康。
家英瞞阿姐飲酒
早前患上肝癌的羅家英亦有出席，家英哥說：「會飲少少紅酒。（身體許可？）少許都得。（依家身體狀況？）OK，都打得波、走得，依家keep住三個月檢查一次，檢查完都話好好。」至於阿姐可知道他飲酒？家英哥即搞鬼地說：「佢梗係唔畀，但少少都容許。」
文：影視組