林耀聲 黃溢濠 肌情勃發激吻戰
組合PlayTime成員黃溢濠（濠B）和林耀聲為新片上演男男激吻！「肌」情洋溢的阿聲更為出浴鏡頭操肌，坦言女友不介意他咀濠B，更大呼「好想睇」！
組合PlayTime成員黃溢濠（濠B）和林耀聲，於經理人麥曦茵執導的電影《曖昧不明關係研究學會》中「肌」情四射，酒吧激吻！濠B自爆於片中錫盡男女：「除咗同好多女仔有接吻鏡頭外，最大突破係同男生有接吻。」說到於酒吧激吻戲份，阿聲大呼：「我哋咀咗超過30個Take！因錫落去太大衝力，個人彈番轉頭！」二人異口同聲表示：「開頭好尷尬，錫錫吓咪豁出去囉。」更直言愈拍愈起勁，不小心把嘴唇滑進對方口內！
女友期待想睇
於戲中情傾好兄弟濠B的阿聲，直言是自薦演此角：「想挑戰吓自己做演員嘅底線，可以去到邊？」更自爆為片中一幕性感出浴鏡頭，下過不少苦工：「拍之前兩個月不停淨係食白烚雞蛋、雞柳同菜。嗰時都練咗六舊腹肌！」又笑言現實中的女友不介意他與同性咀嘴：「佢覺得好搞笑，話好想睇！」
畀王敏奕當「兵」
除激吻外，二人於片中更上演同性曖昧戲碼，濠B更在情人節為阿聲剪頭髮！不過濠B自爆角色內心複雜，與阿聲激咀之餘，他既是王敏奕（Venus）的「兵」又是溝女王：「得唔到Venus先溝女，有向佢表白，好心痛。」二人又興奮表示，此片本來只於香港夏日國際電影節播映兩場，近日再加推一場，令二人深感激咀和操肌都是值得！
文：專案組
攝：吳文聰、Scott
場地：Hooray Bar & Restaurant