張智霖望減天災人禍

「Cool魔」張智霖昨日出席活動時不但一點都不cool,還極之親民,與粉絲玩遊戲餵月餅作零距離接觸。即將生日的他因近期連串天災人禍,深感難過,故生日將不會搞party慶祝,把開party的錢捐去做善事。

張智霖(Chilam)昨日於尖沙咀街頭為美心冰皮月餅活動擔任嘉賓,又與粉絲互動玩遊戲,餵粉絲吃月餅兼搭膊頭合照,作零距離接觸,親民作風冧暈一眾粉絲。

影響心情唔開P

Chilam透露今年中秋節將會身在英國拍攝電影《衝上雲霄》,在當地逗留三星期,還會邀請太太袁詠儀(靚靚)去探班,笑言預了會大出血。他和靚靚快將生日,Chilam說:「我哋已經共度咗好多次生日,已經送到冇咩好送,所以今年決定送月餅。(送英國購物簽帳額?)呢個問題我答唔到你,希望就住啦。我就冇咩想要,希望世界少啲天災人禍。」他強調今年生日不會大搞party慶祝:「發生咁多災難影響到心情,不如將開party嘅錢捐去幫人,朋友都唔好送禮物,將送禮物嘅錢捐出去,太太都有呢個諗法。(叫佢捐個簽帳額出嚟?)佢一定肯,佢心地比我更善良,會身體力行,我哋都有教囝囝,身教比任何嘢重要。」

揀超keep住cool

提到有指Chilam送名車給太太?他說:「冇咁嘅事,佢唔需要,佢需要一個全職司機,嗰個就係我!」他又說兒子魔童也很喜歡英國,將來很有機會送他去當地升學。另外,Chilam日前現身中環Harvey Nichols選購太陽眼鏡作為拍戲之用,他獲安排入VIP房任選,他說:「我個Captain Cool形象深入民心,我都要keep住個cool樣。我想套戲更好睇,有啲嘢要自掏荷包買,真係唔買唔得。」

文:名人組