法拉靚得有效率
由公仔箱躍身大銀幕的陳法拉，全力向影壇發展。早已適應娛樂圈急促節奏的她，閒時卻愛慢條斯理享受生活，甚至變身宅女，玩吓煮飯仔都開心。她追求有質素和有意義的生活，但求不要刻板和不時有驚喜，已感覺滿足。她自言就像所有女生都一樣愛美，但卻不算太貪靚，不會花太多時間在扮靚上，因她是個講求效率的人，且清楚知道甚麼才適合自己。
陳法拉（Fala）近期除了忙於拍攝電影，亦經常獲邀出席各大品牌活動，工作之餘又可率先預覽來季最新潮流，兼趁機挑選心水item，早前她出席配飾品牌PANDORA活動，就看中了不少心頭好。
記：記者
F：Fala
記：除咗買配飾襯衫，有冇收藏珠寶首飾？
F：有，通常都係自己買，自己先知自己鍾意乜，拍賣嘅item我都有，係一啲vintage同antique嘅款式；我好極端，簡單同誇張嘅款式都鍾意，靚就得。
記：可有興趣設計珠寶首飾？
F：有興趣，我鍾意自己配搭，其實配搭都算係設計嘅一種，如果有機會都想有自己品牌，我對珠寶都有啲認識。
記：有冇收過男士送珠寶？
F：都係爹哋送，佢送過一隻黑白鑽戒指畀我，好靚好有型；通常都係爹哋畀錢媽咪揀畀我，我同媽咪會交換首飾戴。其實依家唔係好興男士送首飾，而係自己買畀自己嘅rewards，人哋送太貴重都唔敢收。
classic最穩陣
記：覺得自己係咪貪靚嘅人？
F：係女仔都會貪靚，我係貪靚得嚟唔算太貪靚，唔會太花時間去扮靚，唔會搞好耐先出到門口，我講求效率，勁快可以出到門口。
記：對衣着打扮有乜要求？
F：知道個trend之餘都要啱自己style，要知道邊種打扮最適合自己，我鍾意casual & chic、elegant同埋classic，classic嘅打扮好穩陣，好難出錯。平時會網上shopping，但唔算係購物狂，我好自制，通常會一次過買好多嘢，可能用一日時間去買，冇特定嘅budget，以女仔嚟講唔算多。
記：生活上可會追求奢侈品同享受？
F：着衫嘅話cutting手工好緊要，料要舒服，texture要好，一摸就知係靚嘢，我一摸一望就知道，買名牌係因為佢嘅quality、手工同細節等都好精緻，同埋有保證。
壓力變動力
做得藝人，生活上各方面自然會不時遇到壓力，法拉坦言即使做一個普通人都會有壓力，但自己會將壓力轉化為動力，否則都不會走到今天，她說會時常提醒自己這是人生的一個學習過程，現在懂得如何快速扭轉逆境，例如她會看書減壓，文字可以把她帶到另一個世界，用其他角度看事物，這樣可以紓緩焦慮的情緒。
愛情唔受控
記：今年下半年在事業上有甚麼計劃？
F：主力拍電影，拍戲同拍電視劇唔同，各有各辛苦，電影係更加濃縮嘅故事，背後嘅準備工夫多好多。我好鍾意拍電影，會畀好多idea導演。劇集拍得好快，電影就可能打燈都打好耐，拍過劇集係好好嘅訓練，但都要break一啲劇集嘅節奏，劇集係以對白交代為主，電影唔係，要求活生生嘅人，亦要配合唔同導演嘅style。電視同電影各有各考演技，不過都唔應該刻意去演。
記：家庭、事業同愛情點排列？
F：唔係排，三方面係互相影響，係同時間進行嘅，要三樣都兼顧。我喺香港忙工作，好少返美國探爹哋媽咪，一年先見到一次，好內疚，今年會畀多啲時間陪佢哋，要be aware，盡量去平衡。愛情就得意啲，唔受自己控制，要嚟就嚟，事業都一樣，要睇運氣睇際遇，預料唔到。
記：對愛情有何憧憬？
F：要相信愛情，個男仔未出現已經懷疑，好難會得到真愛，個心要坦誠先可以愛得投入。
記：可渴望結婚生BB？有咩擇偶要求？
F：我都希望有自己嘅家庭同小朋友，我鍾意小朋友，我會係一個好負責任嘅媽咪，唔放心將小朋友交畀工人照顧，要親力親為照顧佢哋，所以如果第時有小朋友應該就會暫停工作，全心做媽咪。揀另一半唔可以用條件去衡量，咁會出事。我講感覺，夾唔夾，而唔係講條件。初初開始拍拖梗係會覺得咩都啱，愛情係盲目嘅，但係耐咗，感情就會轉變，要學習點樣將當中嘅變化昇華，當愛情嘅火花燒完，就會講條件，要互相包容先可以一路行落去。
生活有意義
記：對你嚟講乜嘢係生活享受？
F：我好鍾意食嘢，品嘗美食都係生活享受。食材好緊要，我鍾意自己煮，因為可以揀新鮮嘅食材。我食量仲多過男仔，但食得多唔代表食得肥，可以食得好健康。
記：你嘅life style係點？
F：動靜皆宜，好極端，做artist成日都好tense，經歷多姿多采，好豐富，會處於好hyper嘅狀態。但平日唔使工作時，生活嘅節奏又會好慢，變得好宅女。生活節奏唔可以每日都好快好趕，要休息抖抖。
記：追求點樣嘅生活？
F：追求有質素嘅生活，唔一定要好多嘢好貴重、好fancy好豪華，而係要有details、有驚喜，有啲嘢同平時唔同，咁我已經好滿足同好享受。同埋追求有意義嘅生活，唔會為咗過而過，要有point，未必去到咁偉大，而係自己生活上諗多一層，唔係做人哋expect你要做嘅嘢，要知道自己做嗰樣嘢背後嘅意義，喺尋找嘅過程中會有驚喜，我好怕好麻木咁生活，好似行屍走肉咁，好怕重複嘅生活。
採訪：張嘉敏
攝影：秦健輝
化妝：Mon Cheng@annie G. Chan
髮型：Alex So@P.D.P. eight
服裝：Maje、Sandro