娜姐野蠻女友 搵阿旦打救
感情合則來，不合則分，分開後亦會從中有所得着，拍過一次拖便結婚至今的鄭丹瑞，透過一套愛情電影，令經歷過感情失敗的周秀娜有所啟發。本以為自己是100分女友的娜姐因戲中經歷而改變這想法，她自言從前性格倔強，而且只站在自己立場，「好勝」心態搞到與另一半經常冷戰！
相反，見慣風雨的旦哥自有一套與另一半相處的良方，坦言凡事以老婆大人行先，連交朋友也要得對方批准。雖然這種做法現今社會難以找到，但旦哥生命中只有出現過一個女人，維繫感情的成效不用多說。
素顏娜姐考演技
旦：鄭丹瑞
娜︰周秀娜
筆錄：藍裕彤
旦：點解要搵周秀娜拍《分手100次》？因為佢靚囉，我鍾意佢囉。
娜︰真嘢唔好講出嚟，哈哈！
旦：我選擇演員講直覺，鄭伊健問我女主角搵邊個，我第一時間就話搵周秀娜，當時佢個樣就係咁嘅（嗒糖樣），話︰「好呀好呀！未合作過喎。」愛情好偉大，有人質疑周秀娜得唔得，但我對你嘅愛已排除萬難，我話得就得。
娜︰係呀，愛係無敵o架！
除大眼仔
旦：佢嚟試造型時記得第一件事，係叫佢除咗「大眼仔」先。
娜︰冇呀冇呀，依家冇呀。
旦：佢知道冇「大眼仔」都係靚，之後又同髮型化妝團隊講要佢冇化妝做素人，頭髮搵支鉛筆紮住，恤衫扣到上頸口褸，我唔要Deep V，你哋睇過晒啦，我要睇一個唔同嘅周秀娜，要畀最性感嘅一面，就係演技。
娜︰咁我性唔性感呀？
旦：我一路拍時，覺得已經拍到周秀娜美麗嘅一面，真係性感！大家太熟悉周秀娜嘅性感同身材，但我希望呢部戲後香港多咗一個演技好嘅女演員。
娜︰多謝導演信任我，佢嗰種堅定不毅，對我嘅愛，我哋得咗喇！而呢個造型我幾乎冇咁樣示人過，不過自己幾鍾意，幾大surprise！
倔強女生搵交嗌
旦：戲入面你成日嗌分手，現實中係咪咁？
娜︰現實中少啲嘅，不過都差唔多，哈哈。
旦：冇100都99囉！
娜︰係囉，即係冇100次都有101次，其實我真係拍呢部戲之前，我唔係咁樣，我覺得自己好好，係一個好好女朋友。
旦：未開拍大家對劇本時，佢好堅定亦好擔心咁同我講，導演我應該點演，我話你演番自己，佢話我唔係咁樣o架！
娜︰（狂笑）扮晒嘢話唔係，哈哈！
旦：我當時係倒抽一口涼氣！吓？我冇理由睇錯周秀娜，你唔係咁會係點呀？你唔好扮嘢喎，原來佢根本唔了解自己，你自己講埋落去，拍拍吓之後點。
娜︰其實我成日覺得每個人喺一段關係入面成日睇唔清自己，永遠都係企喺自己個位諗係自私嘅，就算唔係嗌分手，都係強勢性格嚟，同埋我又心急，我係好倔嘅女仔，我覺得同戲入面好相似，如果我識得溫柔啲嗲吓，可能唔需要成日去到冷戰，雖然我唔係成日講分手，但係我咁樣性格，一時之氣嗌嗌吓，死要贏唔輸得，咁講唔掂咪算囉，等同講分手。
娜姐分手夠決絕
旦：好多男仔將關係拖拖拉拉，女仔就較撇脫，分手時係唔會講，如果佢講呢兩隻字因為佢想試吓對方幾愛自己，分手變成維繫感情嘅武器，比講「我愛你」普遍。
娜︰所以我依家更了解自己，知道點相處。
旦：每段關係結束後，都會有分手遺物，你會點處理？
娜︰我係好決絕嘅人，用分手試探搵安全感，好想話畀自己聽呢個男人有幾愛你，但到真正想分手時反而講唔出口，可能決絕到只係一個message交帶完就算，大家曾經擁有嘅嘢都會收埋去，總之唔會留喺自己視線範圍之內。
老婆掌控交朋友
旦：你覺唔覺得男友身邊嘅朋友都係損友？
娜︰我梗係想佢做我認為係好嘅嘢，我同戲中一樣會覺得做咩要搶我男友？我諗係一種亦敵亦友嘅關係，唔知點解佢哋只會撐自己好兄弟，但我係做醜人。女朋友鍾意管呢樣鍾意管嗰樣，只會係發生喺男友身上，講真如果你唔係我男朋友，我可以咩都撐盡。
結識男友老死
旦：我身邊朋友無論男女我老婆都識晒，而且做朋友要我老婆批准，我覺得要嘅，因為我有啲咩人佢要知道晒，尤其係老朋友，全部係喺我老婆控制底下，我老婆唔鍾意我交呢個朋友我唔會去交。
娜︰幾好喎！
旦：因為咁多年經歷佢睇嘢準過我，即使幾有用但最後發覺唔係好人，咁我早期試過，我會信佢講。
娜︰我學識新嘅方式，就係同男朋友嘅好朋友成為朋友。
旦：係呀，之後由佢哋影響番男友。
娜︰（認同）冇錯！
周秀娜：髮型︰Daniel Cheng@ChinG
化妝︰Yan Chiu@ND&Co.Co
服裝︰Hotel Particulier and Amelie Street
鄭丹瑞：化妝︰shushu liao@dick Team
場地︰上海小南國@屯門