羅仲謙預告受傷 怕變花面貓
羅仲謙於新劇飾演公路單車選手，勇字行頭的他透露之後會拍一場踩單車衝落山的戲份，預了會受傷的他坦言最怕靚樣受損，更叫女友楊怡不用擔心。
羅仲謙及蔡思貝日前到尖東海旁拍攝無綫新劇《衝線》外景，劇情講述思貝受傷後「趷下趷下」，獲謙仔出手扶實的戲份。謙仔透露踩單車的戲份最多，自己更是劇中踩單車最出色的一位。他說：「比起佢哋（同劇演員）train多幾日，意外就預咗有，擦損手腳在所難免，希望唔好整花塊面啦。（有乜最危險鏡頭？）高速踩落山嘅戲份。」
唔怕楊怡擔心
問到會否令女友楊怡擔心？謙仔即面露尷尬表情兼怕羞地說：「有咩好擔心？有頭盔同保護裝備，我哋唔好講呢啲嘢啦。」謙仔拍攝時亦不怕女友呷醋，不用埋位時與思貝有講有笑，又捉實對方練走位。
身為港姐亞軍的思貝未卸任已拍劇，《衝線》是她第三部作品。她表示與謙仔做對手戲不緊張，因二人年紀相近，故沒有壓力，更搞笑指謙仔是「未夠班」的前輩，難得謙仔不介意，可見二人十分老友。思貝又指與米雪合作最緊張：「依家拍呢場戲就唔緊張，緊張嘅係之前同米雪姐做對手戲，佢真係好厲害，同佢拍幾場戲，佢已經執到我好多細節上要注意嘅演技。」
文：影視組