羅仲謙熱身踩車 公路飛馳

羅仲謙日前「全副武裝」現身單車徑踩車,烈日當空下為即將開拍新劇做足準備工夫,首次接觸公路單車的他被教練大讚有潛質。由於今次戲份極重,謙仔承諾會瞓身演出,以報答監製的知遇之恩。

謙仔休息約半年「復出」,獲無綫委以重任,於即將開拍、以單車為題材的新劇《衝線》中擔演男主角,與應屆港姐蔡思貝有感情線。他視之為事業發展良機,加上同類題材電影《破風》亦即將拍攝,謙仔自然不想被比下去,雖然距離開拍日子尚有一段時間,他已找來教練進行訓練,相當賣力。

恍如老手

日前發現謙仔偕兩名猛男教練現身科學園單車徑,烈日當空下一身公路單車選手打扮的他操車,見他的單車技術有板有眼,「lock踏」、「破風」姿勢恍如老手,但原來當日是他首次正式接觸公路單車,難怪被兩位教練讚不絕口,其中一位更拿出相機及長鏡,拍下謙仔操車時的英姿,方便日後作比較深入的訓練參考。

事後謙仔接受訪問,提到對單車的認知,他笑說:「有邊個屋邨大嘅牛黃頭唔識踩普通單車吖?不過公路單車難度起碼高十倍。今日嘅訓練好似好成功,但都仲要花啲時間適應,最緊要係能夠應付斜路同險徑出現嘅突發情況。明白有啲嘢唔係一時三刻可以搞掂,不過希望開工埋位時能夠似模似樣,輸人唔輸陣嘛!」稍後謙仔會到台灣拍外景,他自認為食,笑言擔心自己未能忍口狂擦當地美食。

文:影視組