基仔三咀老婆合卺交杯
新婚後首次見人的古巨基（基仔），昨日與老婆Lorraine出席餅店開幕，活動變成預演婚宴，戴上婚戒的基仔三度錫老婆額頭，最後更應經理人霍汶希要求合卺交杯，人逢喜事精神爽，難怪基仔笑指現場的甜品都不及兩人sweet，認真冧爆及肉麻。
古巨基7月12日在拉斯維加斯與拍拖20年的得力助手Lorraine秘婚，兩人新婚燕爾首度現身，昨一齊出席投資近千萬的餅店開幕，吸引半百傳媒採訪，請來森美任司儀，身為基仔好友的周慧敏與夫婿倪震、傅明憲、湯怡、鍾舒漫、衛詩雅及霍汶希（Mani）撐場，Mani送上一對由麵包焗成的龍鳳鈪給一對新人。
開行turbo生B
榮升古太的Lorraine以壓軸嘉賓出場，她的出現即引起哄動，連一眾嘉賓都玩埋一份，記者大叫一對新人「咀嘴」時，Lorraine顯得相當尷尬，在旁的倪震贈興指住基仔說：「我結婚嗰時你叫得好大聲。」基仔初時以錫太太頭髮交差，可惜傳媒不收貨，由於基仔與Lorraine緊張得滿頭大汗，Mani上前為她們抹汗，更指住女方額頭叫基仔錫落去，場面搞笑，為搞氣氛，Mani又要求兩人合卺交杯。
冧爆的基仔全程笑到見牙唔見眼，就連森美都忍不住取笑說：「係咪連甜品都唔夠你哋甜？」基仔即說：「甜品當然唔夠我哋sweet啦。」最後基仔單拖受訪，問到是否三喜臨門？他說：「唔係。（趕生BB？）交畀上天安排，會開行turbo同火箭。」並透露婚宴將於明年舉行，基仔說：「依家物色場地，未定日子。（老闆楊受成包起酒席？）多謝佢，相信當晚唔會畀我埋到單。」
周慧敏新歌祝賀
基仔承認為給老婆驚喜，婚禮是秘密進行，他說：「突然有呢個念頭，特登揀咗個小教堂，當致詞時，見到佢眼紅紅。」而周慧敏承認早就知道兩人會拉埋天窗，為守承諾不敢公開，亦自爆有幾張對方未曝光婚照，又表示有意送首新歌給兩人作賀禮：「想送有錢都買唔到嘅嘢。」
文：音樂組