高海寧撐美斯 龔嘉欣「德」勢不饒人
東方報業集團與無綫電視廣播有限公司合作，昨日分別於尖沙咀及銅鑼灣舉行「東方報業集團世界盃派海報大行動」，迎接明日凌晨阿根廷對德國的世盃決賽。無綫8位藝人出動派海報，當中撐阿根廷和德國的各佔一半，並率先進行隔空牙骹戰，採訪過世盃的高海寧睇好阿根廷，她覺得主將美斯只要一個機會就可射垮德國，龔嘉欣與黃心穎則力撐德國可奪冠！
為迎接明日凌晨3時阿根廷對德國的世界盃決賽，張名雅、龔嘉欣、黃心穎及陳智燊（Jason）昨午一時現身尖沙咀派世盃海報，大批市民爭相索取海報，有小朋友取得海報後雀躍得大擺甫士，亦有不少人即時欣賞海報上的精彩內容及球星的靚相。高海寧（高Ling）、葉翠翠、周志文及周志康則於下午四時到銅鑼灣派海報，市民反應同樣熱烈。
周氏兄弟反阿根廷
曾遠赴南非報道上屆世盃的高Ling，力撐阿根廷夠硬淨：「上屆世盃Keyman（足球評述員馬啟仁）教我認識咗阿根廷，佢哋喺4強戰對荷蘭，個個都好落力，不過德國好有實力，呢場係硬仗。我點都會睇直播，就算加時、射12碼都會睇！我估阿根廷90分鐘可以守和，加時30分鐘內會入1球小勝！就算搵幾多人睇實美斯都冇問題，只要一次機會，佢就可以爆發，搞掂德國！」
翠翠則「美斯情意結」發作：「德國表現好好，捧盃呼聲高，我覺得德國有機會，但我鍾意美斯，情感上話畀我聽係阿根廷贏1:0，人就係咁矛盾。」周志文及周志康兩兄弟齊撐德國，志康說：「阿根廷係厲害，不過得一個美斯，之前幾場入波少，而且係人都知佢係主將，只要mark死佢，佢好難發圍。德國球員高大，又比阿根廷多一日時間休息，贏面高！」
另邊廂的Jason與張名雅力撐阿根廷，Jason更封美斯做綠茵場上的「宇宙最強」：「美斯一個打十個！」張名雅笑說：「我講過美斯『高大』靚仔，佢高過我，係高大呀！你睇張海報個獎盃擺到咁近佢，係有暗示。（有人話佢踢法唔積極？）比賽時間咁長，上半場谷完，下半場只會喺緊張時刻爆發，我估阿根廷贏2:0！」
心穎睇好德國捧盃
龔嘉欣及黃心穎則唱反調，嘉欣說：「我估德國贏2:0，因為佢哋踢得好。好鍾意呢張海報，德國、阿根廷各佔一邊，壁壘分明。」心穎則單刀直入：「阿根廷每次落場都好似唔夠落力，德國4強對巴西上半場已經入5球，我睇好德國捧盃！」
文：影視組