高海寧冧梅拿 龔嘉欣德掂
阿根廷對德國的世界盃決賽萬眾期待，龔嘉欣和無綫世界盃大使高海寧都向德國投以信心一票，嘉欣覺得德國會贏2:1，高海寧亦認為德國有射手湯馬士梅拿贏硬！
無綫將於周一凌晨3時直播阿根廷對德國的世界盃決賽，無綫世界盃大使高海寧和陳智燊、龔嘉欣、黃心穎、葉翠翠、張名雅、周志文和周志康等，將參與今天在尖沙咀及銅鑼灣舉行的東方報業集團世界盃派發海報大行動。今次海報由東方報業集團製作，印有決賽兩軍的球星靚相，包括美斯、希古恩、奧斯爾及湯馬士梅拿等，更附有賽事最近賠率資訊，海報另一面則有無綫眾星，絕對是球迷睇波時的恩物。
向來有睇波的高海寧睇好德國奪冠：「雖然我鍾意阿根廷，但美斯每次落場都被幾個人mark實，好難發揮，反而德國實力較全面，射手梅拿又勁，所以我認為德國會贏，但我都會暗撐阿根廷。希望到時可以同弟弟喺屋企睇，因為嗌都嗌得大聲啲！」一直撐德國的龔嘉欣坦言：「德國由頭到尾都好有默契，合作性好強，呢種團隊精神好重要，所以我覺得德國會贏2:1。」
陳智燊愛美斯
陳智燊認為阿根廷有美斯可睇高一線：「美斯係球隊靈魂，不過，睇德國上兩場波又覺得佢哋有實力，所以我可能最後要面對現實，接受德國贏波。」他亦表示今天會呼籲市民要攞定櫈仔等睇世盃決戰！
另外，高海寧昨穿低胸裙為代言品牌拍照，她透露最近瘦了8至10磅，腰圍只得22、23吋，隱約見到馬甲線。她下月將拍電影《賭城風雲2》，演劉嘉玲手下，同片尚有周潤發及張家輝等，她說：「有打戲，希望快啲全身有肌肉，咁先似打女，仲會着三點式。」
文：影視組