Ashina醉搗盛品儒行 宮出入15分鐘
自認「花弗靚仔」的前亞視高層盛品儒，被《東網》踢爆上周五背住女友蔡一鳳（Michelle），深宵於街頭攬啜「嫩口謝安琪」郭奕芯（Ashina），其後他帶女方進入「盛宮」十五分鐘！不過背上小三之名的Ashina，昨日向《東網》哭訴兼高舉三指向天發毒誓拒做小三，揚言只當盛品儒是朋友，又暗寸對方年紀過大零興趣！
已有公開有米女友Michelle的盛品儒，女友雖然貴為太陽城集團主席周焯華表妹，背景雄厚，但37歲的他上周五竟背住女友偷食，密會新進o靚模組合Super Sexy Hero（SSH）成員「嫩口謝安琪」郭奕芯（Ashina），《東網》全程直擊二人幕幕「激戰」，有片有真相！
Gathering飲大咗
一向緋聞勁多的盛品儒搭上嫩口o靚模，十足全面回春不能自制，他在街頭不避嫌向Ashina攬錫施展冧功後，最後帶她打的直搗北角「盛宮」，整過出入過程約十五分鐘！未知是否怕女友「詐型」，盛品儒聲稱當晚的gathering是「傾公事」，疑似小三Ashina被《東網》極速起底昨日並接受獨家專訪，聲淚俱下否認做小三，揚言對盛品儒零興趣。
18歲的Ashina在經理人陪同下受訪，對於被《東網》踢爆與自認「花弗靚仔」的盛品儒街頭攬錫，她眼濕濕的說跟對方相識兩年多，當晚在酒店和卡拉OK「傾公事」，她承認當晚共飲起碼一公升烈酒，故在街頭才這樣失儀，不過她否認介入「盛蔡戀」做小三，她說：「我哋當晚真係傾公事，講完正經嘢咪飲酒玩吓，可能意識放鬆咗。當時大家有醉意，又搵唔到的士，所以先有啲拉扯嘅行為。」
大一個Double冇可能
Ashina被問到二人情到濃時當街激咀，會否怕Michelle誤會？她說：「我同佢（指盛品儒）真係朋友。（但當街又攬又錫？）真係冇嘢。（佢係咪追你？）你哋自己問佢啦。（你對佢有冇意思？）絕對冇可能，佢大我一個Double，同埋我一開始係朋友心態。（你識唔識佢女友？）唔識，之前有睇過報道，但我哋之前傾偈，佢冇正面講過有女友。」
期間，她應記者要求高舉三指發毒誓不是小三，對於《東網》直擊盛品儒帶她返北角「盛宮」，飽受委屈的她此時忍不住再喊！
記：我哋跟到你同佢坐的士返屋企？
郭：佢好醉，我純粹送完佢返屋企就走。
記：你喺佢屋企留咗十五分鐘做乜？
郭：咁上落升降機都要，我有入到佢屋企，但送完佢就走。
記：佢有冇叫你唔好走？
郭：有少少擾攘，但我始終都係走咗。
記：佢有冇送你落樓？
郭：冇，佢已經好醉，唔覺佢冇風度，因為我哋係朋友。
記：佢有冇再搵你？
郭：有，都係講吓公事，不過呢啲你問佢啦。
記：你可以發誓你冇做小三？
郭：可以，我唔會係小三（隨即舉起三指發毒誓）。
記：公司有冇向你訓話？
郭：都有叫我唔好飲酒，唔好信錯人。
profile
姓名：郭奕芯（Ashina）
綽號：嫩口謝安琪
年齡：18
三圍：33C、24、33
簡介：中韓混血兒的她內地出生，自幼來港生活，甚有音樂天分，考獲六級鋼琴又對古箏有研究，今年連環出兩本寫真集《SCHOOL GIRL》及《Super Sexy Hero》，挾「嫩口謝安琪」之稱殺入寫真戰。
文：專案組
攝影：追蹤組