松岡森巴舞打氣 娜姐食腸撐德軍
掀起全城熱話的世界盃進入四強階段，主辦國巴西將對戰德國，雖然巴西男神尼馬受傷緣盡世界盃，但死忠fans松岡李那表示會跳住森巴舞撐愛隊，陳嘉桓則會跟愛犬齊齊打氣！另一邊廂，宅男女神周秀娜將食住德國腸撐德軍，相信德國球星知道後勢必踢得更醒神！
2014年巴西世界盃四強名單揭盅，主辦國巴西將於7月9日迎戰傳統勁旅德國，力爭決賽席位，巴西腳法華麗奪目，德國戰術穩打穩紮，兩隊均坐擁大批fans，多位星級球迷未開波先興奮，上演一場牙骹戰！
雖然巴西球星尼馬在八強對戰哥倫比亞的賽事中受傷，腰椎骨裂而緣盡世盃，但一班「巴西躉」依然效忠，日模松岡李那前晚身穿低胸裝出席世盃活動時，自認是巴西隊的fans：「我鍾意巴西，我好多朋友係巴西人，佢哋好熱情，鍾意跳森巴舞，我最愛球員尼馬，希望佢早日康復。」她又表示會相約好友睇波，更會跳住森巴舞支持愛隊！
陳嘉桓唔賣舅婆帳
武打女星陳嘉桓（Rose）表示其舅婆是德國人，但親戚都冇情講，她會照樣熱捧巴西：「巴西係主辦國，冇得輸！我唔係燈神，同朋友估中咗好多場，我會約朋友去BBQ睇波，除咗自己買巴西波衫，仲會幫埋隻狗買，一齊支持巴西！」勁愛尼馬的無綫女星何傲兒亦力撐愛隊：「希望尼馬受傷會令全隊人更有士氣，仲有好多好波之人！理性上我認為德國高少少，但點都撐巴西！我估巴西贏二比一！」女星何佩瑜（Jeana）表示向來有情意結支持巴西：「就算冇尼馬，但全隊波嘅精神狀態都幾好，好堅！有冠軍相！下場對德國一樣實食冇黐牙！」
徐子珊肉緊到大嗌
另一邊廂，德國隊連續幾屆也能打入四強，表現穩定深得球迷歡心，女神級的周秀娜亦情傾德國猛男，她寸爆巴西損兵折將，絕非德國對手，屆時會食住腸撐愛隊：「主將尼馬受傷，隊長因兩張牌停賽，巴西捧唔到盃o架喇！德國進攻講整體，我對佢哋有信心，當日諗住約鄭伊健同旦哥（鄭丹瑞）一齊睇波，會買埋德國腸一路食一路撐德軍！」上屆港姐季軍朱千雪前晚出席TVB世界盃活動表示力撐德國：「佢哋今屆踢得好好，而且我爹哋都鍾意，支持！」女星徐子珊大讚德軍夠硬淨，猶如她一樣「打不死」：「我捱住眼瞓睇德國，見到門將紐亞撲出法國差啲入嗰球，我肉緊到Yeah咗出嚟，嚟緊一樣會唔瞓覺睇波！」至於熱愛足球的影星任達華在微博力撐德國：「開球啦！支持德國隊！」
文：影視組