黃宗澤撐網民 醜化子珊
黃宗澤（Bosco）、陳敏之及孫慧雪等無綫劇集《點金勝手》演員，昨日到將軍澳宣傳，Bosco呼籲網絡改圖高手，他說：「快啲搞埋我（改圖），唔好變樣就OK，子珊都敏俊Look幾得意，（醜化子珊？）佢咁大方，OK喎，將我整做『全智賢』啦，搞個改圖大賽宣傳都好喎！」提到劇集內地反應，他說：「個劇內地3億點擊，之前因為某啲原因停咗，無心之失，兩地文化差異，希望『通車』沖番上去，咪當惹起話題囉！」
敏之獲好評
陳敏之以Tube Top示人，她說：「內地反應好，多得黃宗澤，佢喺大陸好紅！（着咁少賀收視？）唔係，夏天啫！4億點擊留畀Bosco着泳褲！尋晚（即前晚）播我小產劇情，好多朋友讚做得好，生過小朋友嘅睇到喊，有好評，我好開心，但我唔想再拍呢類情節，怕第時生BB有陰影！」
孫慧雪對「殘廁Coffee（林芊妤）」遭無綫解約，她說：「我同佢都識，做藝人有責任做好自己。（佢話冇收入，叫記者唔好追車，唔想嘥兜圈錢？）佢咁講？咁搞笑嘅？有工會介紹佢。我諗佢以後要聰明啲，識啲好男仔，好男仔有責任，如果愛個女仔，唔會咁心急要佢喺條街度囉！（你唔去殘廁？）一定唔會啦！」
文：影視組