靚靚護犬駁火 怒轟狗大簋

昨天是廣西玉林市一年一度的荔枝狗肉節,當地狗販大開殺戒炮製「狗」大簋,虐狗圖片極速在網絡瘋傳,圈中一眾星級狗主齊聲譴責殺狗行為!袁詠儀(靚靚)借愛犬帶金一歲生日呼籲抵制狗肉節,豈料引起激進網民爆粗問候及被咒有病,佛都有火的靚靚反擊對方唔文明。愛犬之人蔡卓妍(阿Sa)亦鬧爆虐狗者過分,促當地政府立法取消習俗,刀下留狗!

每年的農曆夏至是廣西玉林市狗隻的「死期」,昨日正值夏至,亦是當地一年一度的荔枝狗肉節,不少狗販按習俗展開屠狗行動。雖然近年已有不少反對殺狗聲音,但部分狗販反利用愛狗之人的同情心作為商機,其中一段狗販於當地市場做出虐狗行為,逼人出錢救犬的報道在網上瘋傳,一眾藝人紛紛被牽動愛狗情緒,在網上齊齊發聲反對狗肉節。

激進網民留言詛咒

最諷刺的是袁詠儀的愛犬帶金正正生於狗肉節,靚靚趁住愛犬一歲生日,昨在微博留言呼籲:「帶金的生日願望是不會再有狗肉節,家中各人身體健康。」大批網友留言支持靚靚,但亦有激進網民持相反意見,爆粗兼指靚靚阻人搵食,有人留言詛咒:「X你媽」、「狗粉,祝你被狗咬得狂犬病」,用字偏激!

身在內地工作的靚靚昨接受本報的電話訪問時,反擊一眾虐狗人士:「唔明一個文明社會點解會做啲咁唔文明嘅嘢,我明大家都有選擇嘅權利,但狗係人類嘅好朋友,好似我養咗帶金一年,佢好了解我,咁可愛嘅動物唔應該傷害佢哋。難聽啲講,大家唔知啲狗嘅來源,可能有啲食垃圾大,如果我哋劏佢嚟食,又唔知有咩連鎖反應。」

阿Sa斥過分殘忍

對於狗販虐狗及被網民咒罵,靚靚勞氣地說:「我知我冇權阻止,但我可以做自己想做嘅事,微博係宣洩自己感受嘅地盤,我盡能力希望人哋關注呢件事。」她笑言已吩咐老公張智霖為愛犬慶生:「但係佢掛住演唱會綵排唔記得買蛋糕,佢話今晚會畀多舊煙肉帶金食。」

另一位星級狗主蔡卓妍(阿Sa)痛斥狗販行為過分,並建議立法保護狗隻:「我覺得呢啲人為咗錢,真係好過分,嗰邊政府應該立法管制啲人去殺害同虐待動物,同埋取消呢個習俗。」至於廖碧兒亦表示殺狗行為令人痛心:「狗係人類嘅好朋友,你會唔會食你朋友?我睇到報道時覺得好心噏,手法太殘忍。佢哋仲要覺得好好玩,睇相見到啲人仲係笑住,賺錢有好多其他方法,唔需要用到呢種方法。」

文:音樂組

第一手消息請下載on.cc東網iPhone/iPad/Android/Windows Phone Apps