杜德偉操弗 應付仔女駁嘴

歌手杜德偉（Alex）與王馨平（Linda）前晚為名媛趙式和有份籌辦的「成長希望基金會慈善晚宴」擔任表演嘉賓，兩人合照時，矮一截的杜德偉即時趷高腳，還叫記者別拍腳，場面搞笑。Alex與太太齊到場，他透露自己年輕時曾經歷過掙扎、困惑期，故一直有關注社會青少年的發展，望帶給他們正能量。

開騷後才度蜜月

問到將來若有兒女，會否是怪獸家長？他坦言：「我怕我會，諗起都緊張，依家見到小朋友都會想像吓做父母，張學友都對兩個女超緊張。我覺得我生仔好啲，生女會比較緊張。不過我鍾意女多過仔，女係前世嘅情人。我要保持自己嘅健康，因為到佢哋踏入反叛期，我都已經有一定年紀，要有好嘅體魄對付反叛期、頂嘴，啲老友好似鍾鎮濤、張學友咁，佢哋成日講仔女經，我聽唔少，好多嘢要學習。」Alex表示因忙於演唱會，現不敢投入造人：「我同老婆就呢個問題好嚴肅咁開過會，如果係生就快啲。不過我哋好享受二人世界，唔想生多個出嚟，將焦點分散咗，演唱會之後先計劃蜜月造人。」

與黎瑞恩通微信

而Linda為今次表演花盡心思，她說：「我落重本o架，又搵人造衫，又搵朋友編曲做音樂，今次會表演英文搖滾歌。」提到好友黎瑞恩承認離婚一事，她表示知情，但因最近忙新碟而未能見面，但有與對方微信，表示小恩子心情不俗。問到小恩子是否與小朋友到外國讀書？Linda說：「唔會依家，兩、三年後嘅事，佢最着緊都係小朋友。」

文：名人組