祖兒咀完傑仔患腸胃炎
草蜢前晚的尾場演唱會請來天后容祖兒任嘉賓，祖兒與成員蔡一傑合唱時，傑仔從後攬着祖兒，不但十指緊扣、面貼面對唱，最後更來個情深咀嘴「friend kiss」，傑仔自爆同性密友張耀揚在場不敢「亂嚟」，但昨日祖兒卻患上急性腸胃炎！
草蜢六場《BE THREE演唱會》前晚在歡呼聲中圓滿結束，藝人張智霖、蒙嘉慧、林海峰、彭羚、周柏豪、關心妍與老公楊長智及蔡一傑同性密友張耀揚等人捧場，天后容祖兒及鄭伊健任嘉賓。
祖兒甫出場即掌聲如雷，隨即自爆小時候勁愛蘇志威（阿細）：「細個發夢成日見到阿細，之前同佢合唱真係願望成真。」抵死的阿智即望住阿細說：「有人（指劉浩龍）嬲呀，你小心。」及後祖兒與傑仔合唱《愛一次便夠》，期間耳機突然鬆脫，醒目的傑仔即從後攬腰為祖兒帶上耳機，之後二人十指緊扣、情深款款對望合唱，唱罷即「咀嘴」。伊健演出時則主動拉實三子邊唱邊以相機自拍。
張耀揚在場
完騷後草蜢出席慶功宴，傑仔表示與祖兒一拍即合：「一路唱我望住佢，佢又望住我，情深款款咁。（當你係劉浩龍？）黐線，梗係冇可能。（咀嘴係即興？）mood到。（錫祖兒唔驚劉生嬲？）Friend kiss啫。」隨即自爆：「我愛人喺度唔可以激吻，我愛人今晚有嚟。」前晚傑仔的同性密友張耀揚也在場，難怪傑仔「唔敢亂嚟」了。
由於明天（16日）是祖兒34歲牛一，問到為何不在台上與她提前慶生？阿智說：「我哋私底下有活動，唔方便講畀大家聽。」並透露明年是草蜢入行30周年，老闆有意再為他們開騷，阿智說：「老闆頭先激讚，話明年30周年一定要做。」談及演唱會主辦之一耀榮娛樂，已故張耀榮的兩房傳反目，三子坦言不知情，阿智說：「我哋一定會做耀榮叔紀念演唱會（8月底），同佢有一定程度情意結。」
另外，祖兒昨午出席無綫舉行的《勁歌金曲優秀選第一回》綵排，之後身體不適缺席晚上的頒獎禮，記者致電英皇，發言人承認祖兒綵排時不舒服：「走咗去睇醫生，知道患咗急性腸胃炎，依家喺屋企休息。」
文：音樂組