陳敏之鐵娘柔情 貼心冧男友

陳敏之近年經常演警員角色,雖然工作時硬朗,但都有溫柔一面,敏之表示現實中她對男友都很溫柔,亦很尊重對方,很多事由對方作主,絕對是「貼心女友」。她又透露年尾會推出福音碟,一圓自己心願。

陳敏之有「索腿天后」之稱,身材標青、美腿修長,不過敏之近年所演的不只是「靚女」角色,當中演過很多專業人士。敏之也覺得近年經常演警員,於播映中的新劇《點金勝手》,她就演商業罪案調查科的高級警官,劇中,黃智賢既是她的下屬,又是她的男朋友,敏之指劇中角色有「chur姐」之稱,工作時很認真,不過放工後對着男朋友就好溫柔。

拍拖相敬如賓

而現實中,敏之與圈外男友拍拖九年,問到現實生活中對待男友是否同樣溫柔時,她謂:「好溫柔,平時同男友相處時好坦率,亦都好尊重佢,大部分啲嘢我都會畀佢決定,況且我係一個好唔鍾意諗嘢嘅人,最好笑係雖然我哋拍咗咁多年拖,但有時大家都好客氣,唔知以為我哋唔係好熟。」

而敏之又指於劇中的角色有很大轉變,最初是正派,後來飽歷滄桑,變了另一個人般,更為達目的而出賣肉體:「呢個角色好多發揮,好似一套劇入面分飾兩角咁。」

年底出福音碟

身為基督徒的敏之計劃年尾推出福音碟,一圓自己心願,現時正揀歌,之後便會錄音,她透露:「會以抒情為主,福音歌不一定係悶,其實都可以將佢演繹到流行曲咁,我依家都成日行山、踩單車做運動練氣。」

文:影視組

攝:司徒國榮