朱千雪派世盃特刊「索」引老外
四年一度的世界盃終於開鑼，無綫昨日派出紅星朱千雪、陳庭欣、馬賽、何傲兒、陸浩明、楊潮凱及羅孝勇聯同足球名家黃興桂及山度士，先後兵分兩路殺入尖沙咀及銅鑼灣大派世界盃特刊《世盃Non Stop》，吸引大批市民、老外、內地旅客搶閱，玩轉老尖和銅鑼灣。在尖沙咀派發的「女神」朱千雪，更受老外歡迎，攞完特刊乘機搭訕兼要求拍合照。
無綫昨日下午先派出四位「世界盃大使」包括前港姐朱千雪、陳庭欣與藝員陸浩明、楊潮凱聯同球星山度士齊齊殺到尖沙咀五支旗杆向市民免費大派東方報業集團呈獻的世界盃特刊《世盃Non Stop》，吸引數百市民爭相取閱，場面熱鬧，特刊不足半小時已經被搶光。
陳庭欣撐英格蘭
朱千雪與陳庭欣兩位港姐級索女現身時即成為焦點，除了吸引本地市民，連老外遊客及內地旅客也爭相一睹藝人風采。有孭着背囊的老外遊客向朱千雪埋身攞特刊，又撩朱千雪傾談及拍照留念，認真要人又要書。而陳庭欣亦被一名內地師奶遊客霸氣地出手搶特刊。朱千雪受訪時睇好巴西捧盃：「巴西有主場之利，但係啲賽事好夜播，唔知到時瞓醒起身睇，抑或睇完再瞓好！」講到苟芸慧在巴西險被球迷「狼吻」，千雪說：「我未去過巴西，如果喺香港畀人強吻會好突然，但係去到巴西氣氛咁熱情，可能唔會覺得係一回事。」陳庭欣就因情意結而支持英格蘭，她又大讚《世盃Non Stop》夠輕便，連女士都可以好方便攞出街。
陸浩明捧阿根廷
陸浩明最受師奶粉絲歡迎，他說：「以為男仔先會攞，點知啲太太同小朋友都過嚟攞，連外國人都攞埋一份，本特刊細細本易收藏！」擁荷蘭隊的陸浩明表示：「捧咗佢哋好耐！但荷蘭都係二奶命，希望今年有機會捧盃！但最有機會嘅我睇好阿根廷，因為巴西太熱門，尼馬會畀人mark到實！」為無綫網絡電視19台主持節目《低俗講波團》的陸浩明表示幾乎會睇盡64場球賽，到時要準備調整生理時鐘，下午睡覺，深夜才有精神講波。講到苟芸慧在巴西險遭「狼吻」，他笑言未試過被女仔主動索吻，但如果遇到男士埋身，會選擇「反客為主」。楊潮凱派特刊時搞笑地向路人介紹封面上的朱千雪，笑謂千雪真人靚過上鏡，吸引不少市民圍觀，他說：「除咗好多香港人攞，外國人、內地人都有，好受歡迎，有老外知道我哋係電視藝人，就搵我同佢哋合照。」
文：影視組