翠如入波慶功 BB乳當災
宅男女神黃翠如在無綫足球旅遊節目中取得神奇Goal，即遭一眾外籍球員「人疊人」層壓式慶祝，興奮肉緊畫面令網民心痛，質疑女神慘遭揸胸抽水！翠如BB即時解畫指大家「情同姊妹」，男友蕭正楠亦透露女友早已備案。
前晚無綫電視播出黃翠如與洪永城到英國拍攝的旅遊節目《走過足球聖地》，當中翠如ＢＢ與眾外籍男同性戀球員切磋球技，在大家「放水」下翠如ＢＢ終於取得Goal，眾男即「人疊人」瞓地慶祝！節目播出後，有眼利網民指翠如ＢＢ當時疑遭胸襲抽水，更指她遭一眾猛男「力壓」，任人蹂躪大感心痛。
網民心痛遭蹂躪
昨日記者致電翠如ＢＢ，提到疑似抽水事件，她說：「嗰集係喺英國曼徹斯特度拍，嗰度係同性戀者天堂，亦有好多古靈精怪嘅球隊。當日拍攝嘅同志足球隊，同佢哋好似姊妹咁。拍嗰時我好想入波，連個龍門都做戲畀我入，原本諗住入波之後拋起我慶祝，點知佢哋一衝埋嚟就撞跌我，順勢攬住我慶祝先有啲混亂，完全冇feel到（抽水）呢樣嘢，嗰時亦都冇諗呢樣嘢，佢哋真係好Nice！」問到翠如ＢＢ當時交叉手護胸？她笑言是本能反應，至於有網民心痛女神遭人蹂躪，她說：「蹂躪就Over咗！佢哋好Nice，拍完大家都有一齊傾心事。」
與翠如ＢＢ打得火熱的男友蕭正楠，對女友充滿信心又指早已備案：「冇乜嘢，翠如都有同我講過。佢哋係同志球員，踢波時大家好開心，冇抽水事件發生。」至於當時與翠如ＢＢ一齊拍攝的洪永城，亦爆對方遭「人疊人」前毫不知情：「冇同球員夾定，但成件事氣氛好開心同Enjoy！」他強調無胸襲事件：「一定冇！班球員鍾意男人，點會咁做。」
文：專案組