杜德偉紅館高潮 老婆搶睇

舞王杜德偉8月再踏紅館開騷,對於為演唱會度身訂造的新歌意識大膽,他直言要毫無保留地精彩!而演唱會預售火熱,連杜太都幾乎都買唔到飛!

舞王杜德偉(Alex)近日回流香港,既推出全新廣東歌《震》,又宣布8月開紅館騷,這是他自1993年後再開紅館個唱,Alex坦言心情興奮,並早已加緊操練,準備勁歌熱舞:「新歌《震》係演唱會嘅縮影,為個唱度身訂造,隻舞一定要毫無保留咁精彩,到最後個Closing一定要係爆嘅,咁樣就係最高潮!」難怪《震》會以在下體部位附近放禮炮作完結,Alex笑言:「一定要有高潮,希望人睇完演唱會會有滿足嘅感覺。」

閂手機避飛債

Alex紅館騷吸引力十足,有指預售反應火熱,Alex笑言確有此事,:「其實未係正式發售,係我哋有個圈內人優先買飛嘅電話,只係同事手機號碼,唔係熱線。但唔知點解流咗出去,搞到佢日日畀人Call爆機,電話都唔敢開。」Alex指誇張程度竟連杜太都差點買唔到飛:「有日太太打電話幫啲親友訂飛,對方話呢度冇飛訂,我太太以為打錯,但睇多次電話號碼又啱,打多次去問『呢度係咪娛樂公司』,對方答『係』,我太太就話『我係杜德偉太太,想訂飛』,對方先答『哦,你等等』。原來因為太多人打嚟,搞到個同事唔敢認有飛賣。」

文:專案組 

攝:黎志輝