張德培有女萬事足

早前張德培（Michael）來港一周出席連串活動，就帶同太太劉安寶（Amber）以及一對寶貝女兒Lani與Maile同行。Michael自退役後便全身投入他與家人於1999年創立的「張氏家族基金會」工作，致力於網球、慈善和福音的事，此外還擔任網球教練，非常忙碌，由於經常要飛往世界各地，心繫家庭的他不想跟太太和女兒分開，所以不論到那裏都會帶妻女同行：「時間永遠都過得太快，作為父母當然都想子女快高長大，但對我嚟講，其實又唔想囡囡大得太快，我感覺大女Lani就好似係尋日先出世，不過佢依家已經3歲，小女兒Maile亦都已經14個月大。愈睇住佢哋長大，愈覺得時光飛逝，喺佢哋任何一個成長過程中，即使係小改變，錯過咗就冇，我唔想錯過任何一部分，所以很珍惜同佢哋相處嘅時光，呢個亦係我經常帶住佢哋飛嚟飛去嘅原因之一。」

至今他跟女兒分開時間最長的一次是3天，然這3天已足以令他牽腸掛肚：「真係好掛住佢哋，盡量都唔想再離開佢哋，平日我出去嘅時間都已經好掛住。」不過隨着女兒長大，到她們上學時就很難跟隨Michael到處飛，Michael對此亦有心理準備：「到時就要配合各方面安排，嘗試取得一個平衡，唔影響到佢哋學業同時又唔使同佢哋分開。」

張德培每到一處地方參與活動，總是帶同妻女在身邊。

張德培網球上的英姿。

愛錫唔等如縱容

每當說起一對寶貝女兒，Michael臉上總流露出由心而發的滿足笑容，看着他絕對可以明白何謂慈父，Michael亦坦言對着女兒，自己是極度心軟，說時綻放出燦爛笑容，又帶點不好意思，這個爸爸相當可愛：「佢哋想要咩就會嚟嗲我，例如想要狗仔，畀佢哋嗲兩嗲我就心軟，佢哋知道媽咪唔會好似我咁。我覺得係因為囡囡都比較嗲，一般爹哋都好難抗拒，如果係囝囝，相信情況就會唔同。」可是，心軟歸心軟，當要教導女兒時，Michael還是會say no的：「如果係啲好clear cut嘅嘢，好明顯可以分對錯嘅，唔啱嘅我就會say no。做個好爹哋去教導佢哋係好重要，愛錫唔等如縱容。我對佢哋嘅期望係希望佢哋愛家人、愛基督、健康快樂，將來做咩職業都唔緊要，睇佢哋興趣，會畀佢哋自由選擇，就算佢哋想入娛樂圈都唔會反對，佢哋對呢方面有熱情、有才華同埋享受嘅話就冇問題。」

張德培於2008年與同為基督徒的劉安寶結婚。	張德培一提到妻女即笑不攏嘴。	張德培將有親筆簽名的巨型網球送贈梁筠彤。

談未來十年計劃

縱然Michael努力做個稱職的爸爸，但也直言也有困難的時候：「有時想陪佢哋，不過自己又好攰。我好享受做爹哋，本身都好鍾意小朋友，鍾意見到小朋友笑。未生Lani之前同太太都想第一個小朋友係仔，諗住哥哥可以照顧妹妹，但生咗Lani同Maile一樣咁開心，唔會話要刻意去追個仔，亦未有計劃，如果再生，生個仔固然好，因為已經有兩個女，加埋我哥哥4個女，總共係6個女，都想有個男仔，但即使再生女都冇所謂，都係咁開心。」

談到未來十年的目標和計劃，Michael依然是以家庭為中心：「未來十年必定都係會成日同太太、囡囡一齊，囡囡年紀仲細，我想做個時時喺佢哋身邊愛護、教導、鼓勵同支持佢哋嘅爹哋。我要做一個體魄強健、愛心滿溢、為囡囡不惜一切，喺佢哋成長過程入面擔當決定性角色嘅爹哋。雖然事業好重要，但我認為都不及花時間陪屋企人重要。所以我會寧願放棄某啲工作，都唔想同妻女分開，無論如何佢哋都係我優先考慮嘅因素。未來十年，我希望可以為孩子嘅人生建立一個堅穩嘅基礎，對我嚟講絕對比自己事業上嘅任何成就更加重要。」之前曾在上海客串電視劇飾演教練一角的Michael，對演戲也有興趣，並不排除會再參與幕前演出，主要視乎所演的角色，而演爸爸就十分適合他。

傳授後輩心得

張德培早前在港出席了「LONGINES Future Tennis Aces發掘未來網球冠軍2014－香港區選拔賽」記者會及委任儀式，還即場傳授打網球心得予代表香港出戰法國網球比賽的12歲網球選手梁筠彤，分享了他昔日比賽的經驗以及泥地作賽的技巧。一向致力培育年輕網球員的Michael表示看見梁筠彤令他感到鼓舞，提醒對方別因對手而亂了自己的打法，他還在一個巨型網球上親筆寫上祝福語句送贈梁筠彤，希望她能「竭盡全力，為港爭光」。梁筠彤將於今日（25日）出戰法國巴黎，與來自其他十多個不同國家的青少年網球選手角逐此項網球錦標賽終極冠軍。

採訪：張嘉敏

攝影：張福宏