娜姐恨拍拖 求送花男現身

周秀娜(娜姐)剛度過二十九歲生曰,坦言今期約會多多,飯局輪住食,及後更反問記者自己是否有問題,皆因送花給她的男士從未現真身,還恨拍拖恨到出口地表示自己無任歡迎識新朋友!

性感女神周秀娜昨日以頒獎嘉賓出席活動,同場有在劇集《愛我請留言》爆紅的童星楊鎧凝。收起咪咪的娜姐只露纖腰,仍謀殺不少菲林。由於本月二十二日是她正日生日,踏入二十九歲的她被笑指明年便三十歲,她即哈哈大笑說:「唔好講呢啲。(大搞生日派對?)仲有好多飯未食。(正日同邊個過?)都係同朋友食飯。(男朋友?)我都想!有男友梗係好,但我就男性朋友多。」至於有沒有追求者約她?她笑着反問記者:「我真係唔知道自己係咪有問題,我發覺送花畀我嘅男士都未見過佢哋,喺新加坡同大陸都有送畀我,但收到神秘花束都唔知邊個送。」

鍾意識朋友

至於生日願望,她表示除了身體健康外,還希望送花男現真身:「下次送禮,都希望佢哋現真身,想多謝佢哋唔知有乜辦法。」問她生日願望想不想有姻緣時,她直言恨拍拖:「我覺得有就更好,拍拖係開心,遇啱就得!(有冇諗過減少工作去識多啲朋友?)我無任歡迎,我都鍾意識朋友,佢哋唔現身都冇辦法!」

舒淇送祝福

此外,娜姐日前還上載與家人慶祝生日的照片到社交網站,見她素顏上陣,不過娜姐平日保養有法,就算素顏示人都冇有怕,樣子依舊省鏡,妝前妝後分別不大!有家萬事足的娜姐跟家人拿起蛋糕齊齊合照,又搞鬼地用手機效果幫爸爸媽媽黐鬍鬚,更齊齊嘟嘴扮可愛!跟家人慶祝過後,娜姐又有花收,她拍下照片大騷鮮花相,還在微博留言:「早!美麗讓人心情愉快,祝你有美好一天!」吸引舒淇用蛋糕公仔送上生日祝福。

文:名人組