許廷鏗周身刀 夢想做波牛
歌手許廷鏗、藝員高鈞賢、吳家樂及宋熙年等昨日出席足球活動，與國際球星戴維斯及雲達同場，眾星即化身小fans爭影合照！超級足球迷許廷鏗現時身兼歌手及牙醫，但原來他自小夢想是成為足球員！
TVB取得今屆巴西世界盃獨家播映權，連月來都有不少與足球有關的活動，攻勢一浪接一浪！昨日TVB與北京聚媒咨詢有限公司合作的活動《足球夢2014》舉行記者會，出席藝人包括許廷鏗、高鈞賢、吳家樂及宋熙年等，荷蘭國家級球星戴維斯（Edgar Davids）及雲達（Aron Winter）專程來港出席，令場面生色不少！難得兩位球星來港，眾藝人當然把握機會「集郵」，兩位球星亦任影唔嬲，家樂仔更與戴維斯不停頭貼頭自拍，表現風騷，宋熙年則興奮得大擺V手！大會宣布兩大球星將在港挑選兩位年輕球員，將他們保送往意甲國際米蘭及英超熱刺球會接受特訓，實現有潛質球員的足球夢！
自認是超級足球迷的許廷鏗自小夢想之一是成為足球員，更曾是註冊球員，每周日均會練波，其父亦有份搞球會：「我都幾貪心，細個想做足球員，又想做漫畫家，到依家都係身兼兩職（牙醫及歌手）。」他又希望有機會獲TVB安排到巴西現場欣賞世界盃賽事。
高鈞賢打籃球兩斷腿
高鈞賢則自爆雙腿均曾跌斷，若踢波會選擇做守門員，不需衝鋒陷陣：「兩年前同半年前都因為打籃球跌斷腳，如果玩足球就做守龍門，最多食波餅，冇咁激烈。（之後做運動有陰影？）冇嘅，但要就住囉！之後我要去巴西採訪世界盃賽事，逗留45日，會同啲小朋友踢波，要小心啲，佢哋好犀利，唔着鞋都踢贏好多人。」宋熙年表示能與球星合照勁開心，並可在緋聞男友陳智燊（Jason）面前炫耀：「我哋都會一齊睇波，佢係世界盃大使，可以教吓我。」
文：影視組