郭偉亮請鐵甲奇俠睇騷
今時今日的郭偉亮幾乎和扮演鐵甲奇俠Iron Man的羅拔唐尼畫上等號，叫他做Iron Man的人可能比叫他真名的還要多，難得他也不介意被扮演這個角色，還食住條水在廣告中幽自己一默，他更笑言已邀請羅拔唐尼到他的作品展，來個真假大對決！
音樂人郭偉亮（Eric Kwok）7月將在紅館舉行三場《我最喜愛ERIC KWOK音樂會》，相信大家一提起他就會即刻聯想到羅拔唐尼，其實Eric自己怎睇？他坦言非常樂意接受：「由細到大如果畀人話你似邊個，總會唔開心，要special嘛，點解要似邊個啫？但我個case有啲唔同，有邊個會唔想似Iron Man先？又有女又有錢又有權，直情係超人，所以似Iron Man係最好o架喇，我冇所謂！」
既然上次在廣告中扮羅拔唐尼的Eric都已抽足水，不如今次請真身現身演唱會，他認真地配合說：「問緊問緊。」並大爆可能會請在廣告中扮神盾局局長的黑人朋友現身：「問咗喇，不過佢真係好full schedule，可能會嚟到一日。」
嘆謝安琪缺席
當然，Iron Man終究也只是個噱頭，整個演唱會靈魂當然是他十多年來創作了超過300首的歌曲，陳奕迅、楊千嬅、葉蒨文、梁漢文和吳雨霏等20多位歌手一口答允演出，Eric笑言原來碌「人情卡」話咁易：「本來以為要好辛苦係咁打電話，原來只要夠膽問就得o架喇，最多咪唔好嚟囉！」
雖然只是講笑，但難免讓人對號入座，例如憑《囍帖街》橫掃十多個金曲獎的謝安琪就未有答應現身，Eric也有點不是味兒：「講真唔知點解佢嚟唔到，佢經理人亦冇畀好合理答案我，我諗真係有好緊要嘅嘢做啦，緊要過嚟我演唱會。（好hurt？）都有o架，話晒隻歌對我嚟講都緊要，我諗對於佢嚟講唔係好緊要啦，都有少少差啲，不過唔緊要，我有好好嘅解決辦法。」
文：音樂組