Eason開唱周迅「起雙飛」
【羅宛君北京直擊】歌神陳奕迅（Eason）昨日現身北京為新國語專輯舉行記者會，好友兼新碟製作人JJ林俊傑親身撐場，剛公開戀情的周迅更拍片到賀，風騷向Eason索「雙飛門票」，期待「雙迅合璧」開音樂劇。
相隔兩年Eason推出新國語碟《rice & shine米‧閃》，唱片公司邀請逾百傳媒及歌迷出席昨日北京記者會，而扁桃腺初愈的Eason顯得精神奕奕，提到新碟封面的「迷你尿尿臣」小石像，Eason抵死笑說：「粗粗的，我說是身體很粗。」近日公開戀情的周迅亦有拍短片賀Eason新碟大賣，還親口索個唱門票預埋男友高聖遠：「留一票給我……不，是兩票。」
「唔通喺拖鞋攞飯食」
Eason受訪時自誇比傳媒早知周迅戀情：「我哋有短訊嘛，早你哋幾分鐘知啦，見佢哋幾開心呀！（傳結婚？）又唔知喎！」對周迅說和Eason「雙迅合璧」，Eason稱：「我哋講過一齊演音樂劇，但依家我要做巡迴，佢可以去拍吓拖先。不過拍拖都要工作，我結婚都繼續做，唔通我喺拖鞋度攞飯食咩！」
至於新碟封套設計有抄襲之嫌，Eason卻不介意：「終於輪到我！呢個係取材於比利時一個好出名嘅石像，我同Jan（林海峰）係想表達一朝早起身最開心做嘅事（洗面、尿尿），你哋話抄咪抄囉，依家香港仲有言論自由，冇所謂喎！」
阿徐欲公開老公全豹
至於昨日Eason太太徐濠縈與填詞人黃偉文一同出席Boucheron珠寶活動，談到「迷你尿尿臣」，阿徐表示唱片公司轉發時遮住了重要部位，內地版唱片亦會遮蓋，她笑說：「我曳曳豬想試下唔遮住post上微博睇下會點？我未試過畀人河蟹，畀人鬧就試得多。（公仔有乜意思？）唔知喎，係林海峰諗o架，要問佢！」對於近日有內地童在港便溺引起風波，會否擔心敏感？她認為社會有言論自由，最重要是發表意見時達到想表達的目的，她說：「其實網上講嘢實有人踩有人彈，我以前都畀人誤會我鬧人，所以依家都係post啲輕鬆嘅嘢，例如跑步，跑步冇人話喇啩！」