蔡少芬「奇兵」家族哂溫馨
一眾藝人日常工作繁忙，難得趁母親節樂享天倫。當中蔡少芬就特地返港，一家四口到主題樂園遊玩，他們更穿上動畫《海底奇兵》的T恤參加學校的親子活動。而愛女大病初愈的楊思琦終放下心頭石，打算留在家「玩煮飯仔」慶祝，至於「嫩版李若彤」陳嘉寶則落廚炮製愛心雞翼冧媽媽，力證自己大個女。
今個母親節對蔡少芬（Ada）別具意義，其老公張晉於剛過去的金像獎獲「最佳男配角」，一顯實力，Ada則做了童裝生意老闆，一家四口樂也融融。據悉，身在內地拍戲的Ada昨特意返港，陪兩千金楚兒及信兒到主題樂園提早慶祝母親節，張晉更放下型男形象，幫手湊女，而Ada與老公和大女楚兒還穿上動畫《海底奇兵》的T恤，參加學校的親子活動。
買五位數保險
Ada昨接受電話訪問時謂：「去主題公園前，我哋兩公婆仲去咗楚兒嘅學校參加親子活動。喺主題公園玩足一日，睇埋煙花先走，仲會喺場內酒店住一晚，認真盡興。」
至於日前爆出愛女Krystal曾患疱疹一型的楊思琦，接受電話訪問時透露囡囡已康復，並說最近以五位數買了多種保險保障女兒：「囡囡有病時我好擔心，以後會更注意衞生，佢成日放隻手入口，會要佢多啲洗手。（點慶祝母親節？）帶媽咪同個女喺屋企食飯，自己煮，出面人多難搵位。（送咩畀媽咪？）未知，其實一家人整整齊齊，健康開心先最緊要。」
家人接受男友
憑電視劇《女人俱樂部》「年輕版李若彤」一角出位的陳嘉寶，則師奶上身，冒雨到街市四出格價，買餸返家和姐姐齊煮愛心雞翼，與媽媽慶祝。陳嘉寶笑說：「好想話畀媽咪知，我已經大個女，唔使擔心，我識照顧自己。（同男友一齊過節？）佢都要陪自己媽咪，不過我屋企人好接受佢，覺得佢幾好。」
文：影視組