鄭俊弘 姜麗文行埋有壓力
無綫藝人鄭俊弘和姜麗文這對半公開戀情的緋聞男女，雖然被多次影到拍拖行街食飯，礙於公司壓力，一直不敢承認戀情。兩人昨日首度同場出席活動，雖刻意企到天各一方，合照時又扭扭擰擰及拒絕一同做訪問，卻是無私顯見私。
鄭俊弘（Fred）、姜麗文（Lesley）、吳雨霏（Kary）、鄭融等人昨日同出席電台節目，Fred和Lesley自傳出緋聞後首度同場，Lesley更着上deep V透視裝，可能怕男友呷醋，加了打底衫後即刻冇晒睇頭。
識趣地彈開
當Fred影單人相時，Lesley即變「望夫石」企在一旁默默望住男友，但當要求他倆合照時，平時自稱「好朋友」的兩人卻有點扭擰，企到離行離列，再三催促下才肯並肩而站。記者再要求兩人一齊做訪問時，Fred的助手即擋駕表示因為唱片公司問題，拒絕兩人一同受訪，在公司壓力下，Lesley為怕男友難做，相當識趣立即彈開，而Fred則一臉無奈！
Kary靈異事件
同場的Kary就自爆患上腸胃炎，更講笑話希望可以肚屙當減肥，她又大爆早前去雅加達拍唱片封套時發生靈異事件：「我哋去咗間荒廢樹屋度拍，一到五點，當地工作人員就會叫我哋走，話嗰度好『猛』。我去到仲影咗五、六張相，點知一開嚟睇，有三、四張都朦咗！（有冇鬼影？）我唔敢睇啦，即刻delete晒。」
鄭融亦表示剛去完美國旅行，先到華盛頓跑半馬拉松的她興奮表示成績有進步：「我第二次跑，跑咗二小時零卅一分鐘。」問她可會想以徐濠縈做目標？她即說：「唔得啦，佢真係好厲害，不過運動係自己同自己比賽。」
文：音樂組