李若彤豁然走出絕情谷
「小龍女」李若彤18年前拍攝《神鵰俠侶》演活經典愛情故事，但回歸現實世界女神卻因溺愛、遷就男友而斷送多年關係，也令自己身陷「絕情谷」10年。現實中，拯救小龍女的不再是楊過，大英雄卻是周潤發。18年後，放下玉女心經的李若彤靠跳Aerobic重拾自我，尋找「答案」。景隨心轉，李若彤眼前已換上美麗風景，小龍女開懷笑了。
拍《女人俱樂部》係天時、地利、人和，除咗志偉仲因為發哥（周潤發）。2003年拍完劇之後就一直冇再拍劇，中間有拍廣告、商演、有兩年去咗湊姨甥，就咁過咗10年渾渾噩噩嘅日子。2012年尾喺飛機撞到發哥，佢同我講：「人點可以唔做嘢o架？」直頭係當頭棒喝！發哥覺得我係搵藉口，嗰次之後就諗「要做吓嘢喎」，後來喺街撞到志偉，佢隨口問我拍唔拍戲，我又隨口答佢話拍。嗰晚發咗個夢，醒咗之後覺得好開心，就覆志偉決定拍，就係咁啱得咁蹺。
10年之後再拍劇都好多掙扎，問自己仲得唔得呢？副引擎停咗咁，腦裏面好多問題，體力、記性應唔應付到？係驚o架，第一日返去排戲，發覺同監製諗法有出入，都有啲擔心！好彩好快投入角色，自己都估唔到咁快上手，拍完之後搵到答案，原來自己仲係得嘅。
渾噩終日 慶幸冇吸毒
其實我有過幾長時間嘅情緒病，最後好得番，係因為唔介意人哋知我有病，如果介意就可能永遠都唔會好番！以前諗嘢非黑即白，恩怨太分明，依家知世界係有灰色地帶，唔需要太執着，放開咗好多，胸襟廣闊咗。其實開竅要多謝發哥，唔係佢一句說話，我仲可能過緊渾渾噩噩嘅日子，但慶幸渾渾噩噩嘅只係生活冇乜寄托，搵運動去打發時間，而唔係亂咁去搵軟性毒品、暴飲暴食、去蒲嚟寄托囉。
傻更更斷送幸福
《女人俱樂部》嘅角色好似自己，雖然我冇結婚、冇小朋友，但係自己都有過一段好長久嘅穩定關係，就好似一段婚姻生活咁，但當時係失去自己嘅生活，所以先話自己渾渾噩噩！嗰時好似當咗自己係主婦咁，另一半想我點生活就點生活，直頭24小時On call，隨傳隨到！傻到就算同朋友食飯，接到電話就即走，完全冇晒自己！受過呢次教訓，將來唔會咁樣處理感情關係，都會好投入，但係唔會另一半叫我做咩就做咩喇，當時覺得相處就係要咁樣犧牲，依家覺得健康關係唔應該係咁，諗番轉頭都覺得自己造就一段關係嘅死亡，乜嘢都太遷就對方，對方自然得寸進尺。分開嗰刻都未醒，過咗好耐先諗通，自己好大責任，因為有我呢啲小女人先會造就成對方係大男人。
依家或多或少都有陰影，有追求者但觀望下先。個心已經唔係咁渴望愛情，有又得，冇又得，都有諗過孤獨終老問題，但係遇到好男人就話啫，唔好咪仲大鑊？有一班心照朋友仲長久啦！所以我呢幾年好鍾意接觸圈外人、新事物，依家過得好開心，之前去覆診醫生話唔使問，睇你個樣就知你好開心。之前係浪費咗10年，但慶幸冇行錯路，如果行咗其他不歸路可能已經唔存在喺世上喇。
幾乎領養做媽媽
台灣女歌手黃小琥嘅《沒那麼簡單》好貼切我依家嘅心情，自己已經過咗發夢嘅年紀，兩個人相處真係「沒那麼簡單」，細個同朋友傾偈話如果有60年命，會揀最有對比，最初30年唔開心、之後30年就好開心；依家人大咗諗法唔同，「轟轟烈烈、不如平靜」，成長咗諗法會唔同，冇辦法去控制，依家覺得阿媽好煩，但有一日自己都會變到阿媽咁煩，除非唔會老啦。
其實我覺得自己係天生做媽媽嘅材料，自己冇小朋友，但係當咗4歲半嘅姨甥係自己個女。3年前有諗過去領養，幾乎收養咗一個台灣嘅小朋友，但屋企人同朋友都反對，屋企人擔心我將來嘅另一半未必會接受，叫我不如將來有另一半先再考慮領養咪仲圓滿？好彩冇領養到，因為對方父母話將來想見下個小朋友，咁樣件事會太複雜，對個小朋友都唔好。依家過咗嗰個時期，應該唔會領養，除非搵到另一半佢都想啦。有次食飯同志偉講：「我要細路仔就搵你o架喇！」大家聽到都嘩然，話要細路都唔搵志偉啦，其實係志偉應承咗我，如果我領養可以幫我聯絡一啲機構啫。
後記
側聞從前小龍女時代的李若彤就如角色一樣沉默寡言，對答說一句沒兩句。沒料面前經過情傷、情緒病的李若彤竟判若兩人，訪問傾談對答如流，由感情事到渾噩10年也毫無忌諱，侃侃而談。由李若彤的開懷笑容，誰人也看得出小龍女已經走出陰霾，打從心底把手放開，所得的往往比想像中更多。
口述：李若彤
筆錄：影視組
攝影：秦健輝