萬綺雯冇肉地Bob嫌棄
萬綺雯（蚊蚊）、林盛斌（Bob）及「細細粒」陳嘉佳前晚以電影《花樣年華》的懷舊造型拍攝無綫新劇，穿旗袍的細細粒自爆抖唔到氣，更經常「爆鈕」！Bob則嫌棄萬綺雯身材「不知所謂」，反而喜歡有肉地的細細粒。
蚊蚊、Bob及細細粒前晚化身電影《花樣年華》中的梁朝偉及「肥瘦張曼玉」，拍新劇《老表，你好hea！》，穿窄身旗袍的蚊蚊大晒24吋纖腰及42吋長腿，她自爆為穿戲服而不敢食飯：「呢件旗袍好窄，我即試即着，連飯都冇食，拍完先再食。」
提到蚊蚊於該劇被Bob嫌棄，她對此笑言好好玩：「劇情講述Bob同細細粒被我發現半夜偷情，之後Bob就發爛渣嫌棄我身材『不知所謂』而要分手，好笑又好玩。（同Bob有咀戲？）只要佢認真錫我就頂得住，唔好整古做怪引我笑。（老公詐型？）唔會啦！（同男主角郭晉安有冇床上戲？）Mood到就睇吓點啦！」
奪螢幕初吻
細細粒以逼爆旗袍裝及腳踏兩吋高跟鞋現身，每當停機時她頻呼腳痛要換鞋，更一度頂唔順僅以紙巾墊地了事，非常搞笑。首次穿旗袍的她坦言抖唔到氣：「我之前試衫時周圍同人講瘦咗20磅，結果做細咗件旗袍，搞到我依家要着束衣先掂，氣都抖唔到，仲成日『爆鈕』。」身旁的Bob即賣口乖讚她索：「我睇到流晒鼻血呀，佢着旗袍實溝死仔啦！」
提到Bob周旋於「肥瘦張曼玉」之間享盡齊人之福，他笑指奪走了細細粒的「初吻」：「佢將寶貴嘅螢幕同現實中嘅初吻都畀咗我！」細細粒聞言即投訴：「我唔理同邊個，總之下一個要咀好啲。」
文：影視組