祖藍被兩女夾攻變M字
王祖藍與王菀之於新片演情侶，昨晚首映卻帶同正印女友李亞男到場，戲內戲外女友齊齊與他合照，享盡「齊人之福」！對於新片獲荷里活片商買下版權，祖藍望荷里活版開拍時能預他一份，即使過鏡也絕無問題，更大爆亞男去年接拍荷里活電影，若他有幸演出，便可雙雙進軍荷里活！
王祖藍、王菀之（Ivana）、許冠文、顏子菲、莊思敏、高海寧、o靚模馮鎵瀠（Naomi）等昨晚現身蕭定一投資的電影《Delete愛人》首映，眾女星性感上陣大鬥搶鏡。戲中與Ivana合演情侶的祖藍，帶同正印女友李亞男撐場，及後兩女更夾住祖藍合照，期間亞男更取笑男友高度謂：「好M字！」
望雙雙闖荷里活
不過，祖藍對於被女友揶揄卻照單全收，笑指身高問題也不是第一天的事情，反而覺得若髮線呈M字更可怕！談到新片成功售出荷里活版權，祖藍謂：「咁要恭喜蕭定一同導演葉念琛，咁人哋都唔一定搵我拍，如果有得過鏡做路人甲就好，其實亞男舊年都拍咗荷里活電影，仲去馬來西亞拍，佢擔心畀人cut，好在5句對白都有得講。套戲講輻射，要蒙半邊面o架，如果今次我都可以去到，就叫雙雙進軍荷里活o架喇！」近日忙於度劇本的他，透露因此推掉不少工作，白白損失過百萬，故稍後要密密搵錢，才能有足夠彈藥娶老婆。
王菀之毛遂自薦
而Ivana對於該片將開拍荷里活版表現興奮，同樣寄望能有份參演，更妙想天開說：「祖藍角色畀畢彼特做、許冠文角色就畀羅拔迪尼路做、當然有茱莉亞羅拔絲、梅麗史翠普演更加好，（驚唔驚兩片有比較？）一定唔同，文化節奏語言都唔同，我有份演1、2秒都好開心，當進軍咗（荷里活）。（不如自薦？）好，係咪都自薦咗先。」至於被指與葉念琛不和的許冠文則否認傳聞，並在現場與祖藍熱情抱抱。
文：影視組