群星圍插
娛樂圈有不少愛護動物之人，他們對寵物都非常有愛心，凡遇到小動物有不獲善待的情況，都會立即為牠們「伸張正義」，絕不會姑息！
薛凱琪：當動物係家人
「對個別例子我唔想畀意見或批評，好多人當正狗仔貓仔係家人，所以我唔會評論人哋嘅家事，我本身好錫小動物，如果平日一家人出外，我會將啲貓仔交畀超級鍾意小動物嘅朋友代為照顧，或者唔叫助手陪我出埠，叫佢每日上去兩次，幫我啲貓仔換糧同換水，仲要同佢哋玩一陣。」
宣萱：狗係需要人陪
「梗係唔得，貓會獨立啲，狗唔可以，狗係需要人陪，所以我啲朋友一個人住，我會叫佢唔好養狗，我因為屋企有工人，所以出trip都有人陪啲狗，其實如果搵唔到人幫手，可以擺喺狗酒店，可能佢無經驗，下次就唔好嘞！」
江美儀：24小時跟身
「人哋啲嘢我唔評論，不過我自己係狗奴才，要24小時跟身，既然養得佢，就要畀到佢安全感，如果去旅行，我會擺低畀男朋友或媽咪照顧，如果全部一齊去旅行，就會帶佢返去狗媽媽度，唔可以擺低佢冇人理，就算有足夠食糧都唔得。」
張文慈：送去狗酒店
「狗都有生命，3日真係唔知會發生咩事，如果真係冇時間打理，都應該搵親友幫手，再唔係要送去狗酒店。」