Jeana涉虐狗捱轟：唔再犯
o靚模何佩瑜（Jeana）養了兩隻芝娃娃「芝芝」及「豆豆」，她曾自言對狗狗錫到燶，昨日卻有讀者投訴，狂轟她「誤狗一生」，指她曾離家三日，雖有留下糧水，但狗狗卻沒人照顧。Jeana表示曾因疏忽照顧愛犬而內疚反省，並承諾不會再犯。
昨日有讀者投訴，指o靚模何佩瑜（Jeana）虐待寵物，讀者表示曾收看寵物節目，見到養了兩隻芝娃娃「芝芝」及「豆豆」的Jeana，在節目中透露對愛犬的「悉心照顧」，即令他無名火起，直言想爆粗鬧醒Jeana。
芝芝跳車受傷
該讀者怒插Jeana有兩大罪狀，第一是因Jeana的疏忽，導致狗仔芝芝後腳終身殘廢，事緣有一次Jeana駕車時，芝芝突然「跳車」，令後腳受傷，而事後Jeana未有找到專業獸醫好好治理，令芝芝後腳從此長期「吊」起。第二就是Jeana在節目中自爆，曾因未能找到朋友幫助照顧下，獨留狗仔在家三日三夜。以上行為令愛犬讀者扯火，直斥Jeana未有狗主的基本常識，更認為她對自己的「劣行」不以為然，最後祝福她的兩隻狗仔「芝芝」及「豆豆」往後可以福大命大。
昨日記者致電Jeana，表示有讀者指她未有善待寵物，她即坦承曾因愛犬受傷而感內疚，對於芝芝的腳傷，她坦言：「之前芝芝隻腳整親，我都有內疚同反省，因為始終影響咗狗仔一世，會諗以後可以點照顧得佢哋好啲。而當時獸醫指芝芝隻腳啲骨好細，所以處理比較麻煩，我都好徬徨。」對於獨留寵物在家中的「指控」，Jeana亦直認不諱：「因為嗰陣時走得太急忙，冇時間拜託人照顧狗仔，但我都已經準備好晒啲清水同狗糧，返到去，啲水同狗糧都仲未食晒。」
朋友讚狗獨立
對於讀者狂轟，Jeana表示多謝：「要多謝佢先真，我自己一路都有反省，承諾唔會再犯，以後會小心照顧狗狗。好似嚟緊呢個月我要去馬來西亞拍戲，我都已經預先拜託媽咪照顧啲狗，仲買足狗糧。」問Jeana有沒有身邊人指她未有照顧好寵物？她說：「反而冇，我同啲朋友講因為照顧唔到狗仔，要佢自己留喺屋企，佢哋仲讚芝芝好乖，識得照顧自己。」
文：專案組