RubberBand煮意多多冧阿媽

臨近母親節，RB四子日前相約一齊出「煮」意，炮製沙參玉竹燉竹絲雞和桂花蜜餞金華火腿窩粑孝敬媽媽。鮮有入廚的四子在大廚的從旁協助下完成兩道菜式，更率先試味確保能夠「出得廳堂」。問到四子平時可會煮幾味給媽媽和另一半，他們都搖搖頭。而剛新婚不久的成員阿偉表示，雖然甚少落廚，但亦有拿手小菜：「我有煮飯，不過唔係好多，一年有五、六次，最拿手係蒸排骨，阿媽都讚好食，由買到整都係我一手包辦。其實要買到靚排骨好難，因為同啲豬肉佬唔熟，靚嗰啲留晒畀啲師奶。」

最怕街市濕漉漉

問到他們會否做「星級跟班」，跟媽媽去街市買菜，成員泥鯭坦言好怕去街市：「我好驚去濕漉漉街市，好驚去濕貨檔，好驚經過豬肉檔掛住抽內臟，所以細個同阿媽、阿婆去買餸，我喺乾貨檔等佢哋出嚟接我。」而阿偉亦自爆去街市的恐怖經歷：「試過有隻曱甴沿住條褲爬上嚟，真係好核突。」

絕少入廚的泥鯭（左）及6號炮製沙參玉竹燉竹絲雞。

阿偉（左）和阿正確保美食「出得廳堂」率先試味。

紅館大唱感受

雖然四子鮮有為媽媽落廚，但卻試過為媽媽作曲，將對母親的感謝憑歌寄意，成員6號說：「首歌係講大個咗之後，好怕媽媽成日對你噓寒問暖，但當你去到同佢生你嘅年紀差唔多大時，你就會明白佢當時嘅心情，其實歌詞都幾含蓄，之前喺紅館唱過，對自己嚟講幾難完成，因為裏面包含嘅情感都幾澎湃。」

文：音樂組