祖藍抓撈單挑賓史迪拿
王祖藍與許冠文主演的新片《Delete愛人》備受注目，有荷里活電影公司拍板購入版權，並有意找美國笑匠賓史迪拿演祖藍的角色，難怪祖藍得知消息後非常興奮，主動抓撈說：「叫埋我去演啦！」
王祖藍、王菀之、許冠文主演、葉念琛執導，蕭定一有份投資的電影《Delete愛人》題材新鮮，據知荷里活電影公司Nu Image早前曾派員來港出席FILMART活動，並欣賞了一場《Delete愛人》神秘試映場，結果電影公司對該片甚有興趣，主動向蕭定一方面提出以50萬美元（約390萬港元）收購版權重拍成荷里活版，經多月洽商，終成功達成協議，估計最快明年正式開拍。
積尼高遜替許冠文
據知，電影公司有意找美國一級笑匠賓史迪拿（Ben Stiller）飾演祖藍的角色 ，奧斯卡金像獎「最佳男主角」積尼高遜（Jack Nicholson）則演許冠文一角。蕭定一在電話訪問中承認：「係有咁嘅事，但版權費唔可以透露。當然如果真係由Ben Stiller、Jack Nicholson演出，我哋當然無異議啦。傾談過程我哋好着重劇本會修改幾多？佢哋用幾多Budget去拍？據知佢哋會搵有分量嘅喜劇導演執導。」祖藍得知消息後說：「非常好呀，叫埋我去演啦。如果真係由Ben Stiller去演我個角色，我感到好榮幸。」
另外，祖藍昨日在將軍澳電視城拍攝新劇《老表，你好hea！》，林盛斌（Bob）與陳嘉佳（細細粒）上演煙韌戲份，不過祖藍笑言：「佢哋有好多咀戲，但今日只係咀少少，成單嘢好油膩呀！肥Bob咀肥妹！」祖藍又笑言把感情戲都寫了給Bob與細細粒，自己則做反派爭產：「我見咁多人做過爭產我好唔抵得，所以今次就寫爭產畀自己做。」
文：影視組