志偉爆李若彤抑鬱冇晒
曾志偉「處男下海」監製的新劇《女人俱樂部》，講的是七個女人重拾真我的故事，戲裏戲外令眾女主角重拾自信，志偉指有輕微抑鬱的李若彤，拍攝後陰霾盡掃，回復昔日風采。
縱橫電影圈多年的曾志偉一直未監製過電視劇，直到去年與監製陳維冠雙雙監製無綫劇集《女人俱樂部》，更由憑《桃姐》奪得金像獎最佳編劇的陳淑賢（Susan）擔任編審，幕後陣容已星光熠熠。令人意外的是志偉「處男下海」監製的劇集竟然是一套女性劇，他坦言今次是老闆陳國強邀請他拍攝，沒有規限拍攝甚麼題材，當時剛好看過韓國電影《陽光姊妹淘》十分喜歡，故決定改編拍攝。
角色一拍即合
《女人俱樂部》選角亦一波三折，志偉最初屬意毛舜筠擔任女主角，後來因檔期問題再三換角，最神奇是最後竟然在兩日內落實了李若彤、李麗珍、陳慧珊、江欣燕、袁潔瑩、張慧儀、葉蘊儀等主要角色，志偉說：「搵李若彤好機緣巧合，同Susan喺街撞到佢講開，咁就一拍即合。最難搵嘅係袁潔瑩，佢話肯出嚟見你已經係好大突破，然後考慮咗三日，睇吓自己應唔應付到，最後先答應，仲連角色都唔揀由我哋決定。」
求口碑冇壓力
劇集主題講述女性遇到社會、家庭、感情等複雜問題，繼而重新出發找尋自我，充滿正能量，望為怨氣滿布的社會打氣。事實上七位女主角亦透過劇集重拾真我，志偉說：「佢哋由藝人到結婚、離婚都遇到好多唔同嘅問題，拍嗰陣佢哋都感同身受，睇住佢哋由唔開心、迷惘、怕衰，到重新振作重拾自信，而李若彤亦好明白套劇嘅宗旨，佢話要話畀人知女性係得嘅，佢本來有小小抑鬱，拍完之後冇事，啲人都讚佢靚咗。」
而眾女主角亦變成好友，互相扶持，拍攝時李麗珍遇上演戲問題，志偉說：「佢好在夠坦白，佢可能拍開電影，唔習慣電視劇拍法，佢同我講做唔到，大家就諗辦法搵導師幫佢點樣去閱讀劇本去演戲。」志偉對收視沒有壓力，認為口碑最重要，希望吸引觀眾追劇。
採訪：影視組