周汶錡聽老公話槽肥生B
名模周汶錡（Kathy）前晚穿上透視裝出席活動，若隱若現透出fit爆身材，展現健康性感！但原來Kathy早前不幸患上腸胃炎，兩日瘦了5、6磅，跌至15年最低體重，她更自嘲當時瘦到似厭食症，令老公非常擔心！
周汶錡、Cara G.、楊張新悅、黃泳霖等前晚出席鞋履品牌活動，Kathy穿透視裝透出fit爆身材！她自爆早前因食物中毒而消瘦：「之前仲瘦啲，因為食錯嘢腸胃炎，兩日瘦咗5、6磅，得番49.5kg，15年冇試過呢個磅數，瘦到有少少似厭食，老公都好擔心，叫我食番多啲，兩日就肥番。」她又透露平日有做瑜伽，問是否為生BB作準備？她笑說：「好驚，老公話生B要肥啲，我會加油啦。」
踩單車做啦啦隊
她又透露過去的復活節做了賢妻，陪老公到台東參加鐵人賽：「我做啦啦隊，我好叻呀，踩單車追住佢，好耐無試過踩，但幾開心，好多童年回憶，不過依家啲單車有電，會愈踩愈快，唔使出力。」
楊張新悅大肚免疫
懷孕四個月的楊張新悅仍穿上四吋高跟鞋，並與同場的設計師Charlotte Olympia Dellal親吻和合照，她表示大肚婆也可以很型格，所以不想穿上大肚衫和平底鞋。她表示未知腹中塊肉的性別，要五月才知。提到她在微博指細女發燒，她說：「我陪佢瞓咗三晚，小朋友病會咳，三晚我自己都頂唔順。（你唔驚傳染？）本身都驚，但有人話大肚婆防疫能力好高，已經燒咗四日，一般係要入院，但大女都試過燒七日自動好番，想細女試呢個方法，自己好抗拒小朋友食抗生素。」
文：名人組